Qazaxıstan “Terrex – Barys A” amfibiya zirehli maşınını kamikadze PUA ilə silahlandırıb

Qazaxıstanın “Kazakhstan Paramount Engineering” (KPE) və “Barys Dynamics” qrupuna daxil olan WSE LLP şirkətləri İli çayı sahilində “Terrex – Barys A” amfibiya zirehli maşınının döyüş və texniki imkanlarını nümayiş etdirən genişmiqyaslı sınaq keçirib.

“Poliqon” KPE-yə istinadən xəbər verir ki, maşın Qazaxıstan istehsalı olan “Ansar” döyüş modulu (30 mm-lik avtomatik top, tank əleyhinə idarə olunan raket (TƏİR) və kamikadze PUA) ilə təchiz edilib.

Sınaqlar “Bereg” təlim mərkəzində keçirilib. Tədbirdə Qazaxıstan təhlükəsizlik və müdafiə qurumlarının nümayəndələri iştirak edib.

8×8 təkər formullu “Terrex – Barys A” münaqişələrin müxtəlif intensivlik səviyyələrində geniş tapşırıqları yerinə yetirmək üçün nəzərdə tutulmuş çoxfunksiyalı platformadır. O, gücləndirilmiş mina qoruması sistemi ilə seçilir. “Terrex – Barys A”nın ikiqat V formalı (V-over-V) gövdə konstruktsiyası partlayışların təsirini minimuma endirir və maşın zirehli korpusun istənilən nöqtəsi altında 10 kiloqram TNT ekvivalentində partlayışa tab gətirə bilir. Maşın həmçinin yüksək ballistik qoruma səviyyəsinə malikdir. Belə ki, o, standart komplektasiyada STANAG 4569 Level 4 müdafiə səviyyəsini təmin edir, əlavə zireh quraşdırıldıqda isə qoruma Level 5 səviyyəsinə çatır.

Platformanın ən diqqətçəkən üstünlüklərindən biri isə təsiredici amfibiya imkanlarıdır. Xüsusi formalaşdırılmış gövdə maşının su üzərində sabit hərəkətini təmin edir və o, “Beaufort” şkalası üzrə 3 bala qədər dalğalarda, 3-5 m/s külək sürəti şəraitində, 0.6 metrədək dalğa hündürlüyü və 2-3 m/s axın sürəti olan sularda problemsiz üzə bilir. İki ədəd su mühərriki sayəsində maşın suda 11 km/s-dən artıq sürət yığır. Mütəxəssislər bildirirlər ki, bu amfibiya xüsusiyyətləri sayəsində “Terrex – Barys A” güclü axını olan iri çayları belə əvvəlcədən hazırlıq tələb etmədən rahat şəkildə keçə bilir.

Qazaxıstanda hazırlanmış məsafədən idarə olunan “Ansar” döyüş modulu geniş silah sistemləri ilə təchiz edilib. Modulun silahlanmasına 30 mm-lik 2A72 avtomatik top, 7.62 mm qoşalaşdırılmış pulemyot, inteqrə olunmuş tank əleyhinə raket kompleksi, avtomatik qumbaraatan, kamikadze pilotsuz uçuş aparatı (PUA) və inkişaf perspektivinə malik lazer sistemi daxildir. “Ansar”ın ən mühüm üstünlüklərindən biri WSE tərəfindən hazırlanmış innovativ atəşin idarə edilməsi sistemidir. Bu sistem operatora vahid interfeys üzərindən müxtəlif tip silahları eyni zamanda nəzarətdə saxlamağa və koordinasiyalı şəkildə tətbiq etməyə imkan verir.

Demonstrasiya zamanı ilk dəfə olaraq “Terrex – Barys A” platformasından kamikadze PUA-nın real döyüş buraxılışı həyata keçirilib. Bu yeni nəsil PUA 140 kilometrədək zərbə və nişanalma məsafəsinə malikdir. 7 kiloqramdan artıq döyüş başlığı ilə təchiz olunan PUA həm mobil, həm stasionar, həm də möhkəmləndirilmiş hədəfləri məhv edə bilir. Sursatın elektro-optik sistemi ekipajı real vaxtda kəşfiyyat məlumatları ilə təmin edərək əməliyyat zamanı vəziyyətə daim nəzarət imkanı yaradır.

Kəşfiyyat və zərbə imkanlarının eyni platformada birləşdirilməsi bölmələrin situasiya məlumatlılığını əhəmiyyətli dərəcədə artırır və onların döyüş şəraitində daha çevik, daha dəqiq və daha effektiv fəaliyyət göstərməsinə şərait yaradır.

“Terrex – Barys A”nın nümayişi Qazaxıstanın müdafiə sənayesi kompleksinin sürətlə inkişaf etdiyini və ölkənin strateji milli hədəflərini yerinə yetirə biləcək qabiliyyətə sahib olduğunu göstərib. Hərbi ekspertlərin fikrincə, bu yeni nəsil platforma Qazaxıstan Silahlı Qüvvələrinin döyüş imkanlarını əhəmiyyətli dərəcədə genişləndirir, ölkə daxilində müasir mühəndislik və istehsal potensialının formalaşdığını təsdiqləyir, habelə Mərkəzi Asiyada zirehli texnika bazarının inkişafına yeni təkan verir.