“Rheinmetall” Baltikyanı ölkələrə döyüş sursatı tədarük edəcək

Almaniyanın “Rheinmetall” şirkəti Estoniya və Litvadan piyada sursatlarının tədarükü üçün müxtəlif sifarişlər alıb.

“Poliqon” “Rheinmetall”a istinadən xəbər verir ki, bu sifarişlərin ümumi dəyəri təxminən 33 milyon avro təşkil edir.

2025-ci ilin ikinci rübündə “Estoniya” tərəfi “Rheinmetall” şirkəti ilə əl qumbaralarının tədarükünə dair çərçivə müqaviləsi imzalayıb. Müqaviləyə əsasən, qəlpəli əl qumbaralarının 2026 və 2027-ci illərdə, hücum tipli əl qumbaralarının isə 2026-cı ildən 2029-cu ilə qədər tədarükü planlaşdırılıb. Bu sifarişin ümumi dəyəri təxminən 17 milyon avro təşkil edir.

Litva isə 2024-cü ilin dekabr ayında “Rheinmetall” şirkətinə artıq bir neçə on min ədəd 40 mm x 46 “HE Frag” döyüş patronları üçün sifariş verib. Bu sifarişin dəyəri təxminən 16 milyon avrodur. Sursatın tədarükü 2026 və 2027-ci illərdə həyata keçiriləcək.