Almaniyanın “Rheinmetall” müasir dəniz müharibəsinin tələbləri üçün hazırlanmış yeni nəsil GMF 140 freqatını təqdim edib.
“Poliqon” “Rheinmetall”a istinadən xəbər verir ki, uzunluğu 140 metr, su basımı 6000 tondan çox olan GMF 140, NATO və müttəfiq ölkələrin Hərbi Dəniz Qüvvələrinin (HDQ) dəyişən əməliyyat tələblərinə cavab vermək məqsədilə hazırlanıb.
Bildirilib ki, yeni freqat sağqalma qabiliyyəti, döyüş gücü və missiya çevikliyi baxımından qlobal freqat bazarında yeni standart müəyyən edir. Şirkət GMF 140-ı beynəlxalq bazarlara təqdim etməyi planlaşdırır və onu ilkin mərhələdə Şimali Amerikada həyata keçiriləcək satınalma layihəsi çərçivəsində təklif etməyi nəzərdə tutur.
Dünyanın ən mürəkkəb təhlükə mühitlərində fəaliyyət göstərmək üçün xüsusi olaraq layihələndirilən GMF 140 yüksək səviyyəli hava və ballistik raketdən müdafiə, sualtı qayıqlara qarşı mübarizə və uzaqmənzilli zərbə imkanlarını yüksək sağqalma qabiliyyətinə malik, rəqəmsal inteqrasiya olunmuş və minimum ekipaj tələb edən platformada birləşdirir. Layihə açıq dəniz əməliyyatları üçün optimallaşdırılıb, eyni zamanda patrul, sahilyanı və koalisiya missiyalarını dəstəkləmək üçün zəruri çevikliyi qoruyur.
GMF 140 ABŞ istehsalı olan əsas radar sistemləri ilə inteqrasiya ediləcək şəkildə hazırlanıb. Bu radarlar adi hava hədəfləri, hipersəs silahları və ballistik raketlərə qarşı yüksək aşkarlama, izləmə və məhvetmə imkanları təqdim edir. Freqat, həmçinin AEGIS döyüş idarəetmə sistemi və müxtəlif hava hücumundan müdafiə, ballistik raketdən müdafiə və quru hədəflərinə zərbə raketlərini buraxa bilən 64 ədəd konteynerdən ibarət “Strike-Length” vertikal buraxılış sistemi ilə təchiz olunub.
Bundan əlavə, GMF 140 “Lockheed Martin” şirkətinin CMS330 döyüş idarəetmə sistemi kimi digər döyüş idarəetmə sistemləri ilə də təklif oluna bilər. Açıq arxitekturaya, qarşılıqlı uyğunluğa və yüksək miqyaslana bilən imkanlara malik olan CMS330 Avropa istehsalı sensor və silah sistemlərinin inteqrasiyasını dəstəkləyərək donanma üzrə vahid döyüş idarəetmə ekosistemi formalaşdırır və özünü real əməliyyatlarda təsdiqləmiş yüksək performans təqdim edir.
Çoxsahəli döyüş platforması kimi layihələndirilən GMF 140 qabaqcıl sualtı qayıqlara qarşı mübarizə imkanlarına malikdir. Freqat aşağı radar və akustik görünürlüyə malik korpus, inteqrasiya olunmuş akustik idarəetmə sistemi, korpusa quraşdırılan və yedəyə alınan sonar sistemləri, həmçinin ABŞ və ya Avropa istehsalı dəniz helikopterləri və pilotsuz sistemlərin yerləşdirilməsi imkanları ilə təchiz edilib.
