Rusiya S-350 “Vityaz” ZRK-ləri silahlanmaya qəbul edir
Rusiya Müdafiə Nazirliyi qarşıdakı illərdə yeni “Vityaz” S-350 zenit-raket kompleksinin (ZRK) satın alınma müddətini və sayını müəyyən edib.
“AzeriDefence” Rusiya mediasına istinadən xəbər verir ki, bu barədə Müdafiə Nazirliyi açıqlama verib.
Rusiya Silahlı Qüvvələri hər il 2027-ci ilə qədər “Vityaz” S-350 ZRK-nin ən azı iki divizion dəstini alacaq. Tədarükün nə vaxt başlayacağı açıqlanmasa da “Vityaz”ın ilk dəsti sınaqlardan sonra 2020-ci ilin fevralında Qatçinadakı Hava Hücumundan Müdafiə Qoşunlarının təlim-tədris mərkəzinə təhvil verildiyi, tezliklə döyüş növbətçiliyinə qəbul ediləcəyi bildirilib.
Müdafiə Nazirliyi bildirib ki, S-350 ZRK Rusiyanın Quru Qoşunları, Hava-Kosmik Qüvvələri və Hərbi Dəniz Qüvvələrində fəaliyyət göstərəcək. İlk “Vityaz” Abakandakı Mərkəzi Hərbi Dairənin 24-cü raket briqadasına təhvil veriləcək.
Yeni sistem analoqlarından fərqli olaraq daha yığcam və ucuz olması ilə yanaşı S-400 və S-300 zenit-raket komplekslərinin bütün imkanlarına sahibdir. S-350 ZRK mühüm əhəmiyyətli obyektlərin – qərargah, müəssisə, inzibati mərkəzlərin və s. hava hücumundan müdafiəsini təmin etmək üçün nəzərdə tutulub.
Bir kompleks 12 raketlə təchiz olunur, bir divizion 8 kompleks ilə silhalandırıla bilir. “Vityaz” S-350 zenit-raket kompleksinin heyəti 3 nəfərdir.
5 dəqiqə ərzində döyüş vəziyyətinə gətirilən S-350 ZRK aerodinamik hədəfləri, təyyarələri və ya qanadlı raketləri 60 kilometrə qədər məsafədə və 10 metrdən 30 kilometrə qədər hündürlükdə, ballistik raketləri 30 km hündürlükdə məhv edə bilir.
