Ukraynda tutucu dronlar “DOT-Chain Defence” platformasına əlavə olunub

Ukrayna Müdafiə Satınalmaları Agentliyi tərəfindən tutucu dronlar “DOT-Chain Defence” platformasına əlavə olunub.

“Poliqon” xəbər verir ki, bunu Ukraynanın müdafiə naziri Denis Şmiqal özünün “Telegram” səhifəsində elan edib.

“Müdafiə Qüvvələrimizi ən müasir vasitələrlə təminetmə prosesini maksimum dərəcədə sadələşdirməyə və sürətləndirməyə davam edirik. Müdafiə Nazirliyinin Müdafiə Satınalmaları Agentliyi silah platforması “DOT-Chain Defence”yə kritik əhəmiyyətli bir element olan tutucu dronları əlavə edib. Bunlar düşmən kəşfiyyat və zərbə PUA-larına qarşı effektiv mübarizə aparmaq üçün nəzərdə tutulmuş xüsusi pilotsuz uçuş aparatlarıdır. Onlar taktiki səviyyədə bizim hava hücumundan müdafiəmizi gücləndirəcək”, – deyə müdafiə naziri vurğulayıb.

Onun bildirdiyinə görə, artıq bölmələr dövlət vəsaiti hesabına və əlavə razılaşdırmalara ehtiyac olmadan, birbaşa İT sistemi vasitəsilə özləri üçün lazım olan vasitələri seçib sifariş verə bilərlər: “Platformada artıq üç ukraynalı istehsalçının dronları mövcuddur, daha üçü isə yaxın zamanda müqavilələşdiriləcək. Biz Ukraynanın müdafiə-sənaye kompleksinə investisiya qoyuruq. Texnologiyalar cəbhə üçün işləyir. Hər bir bölmə çağırışlara operativ cavab vermək və ən yaxşı avadanlığı əldə etmək imkanına malik olmalıdır”.

Qeyd edək ki, “DOT-Chain Defence”, bölmələrin lazımi avadanlıqları özləri seçdiyi və Müdafiə Satınalmaları Agentliyinin bürokratiyanı öz üzərinə götürdüyü rahat və şəffaf bir platformadır.