Vətən Müharibəsi Qəhrəmanı Azər Yusiflinin xatirəsi anılıb
Mart ayının 28-də Azərbaycanın ərazi bütövlüyünün təmin olunması, müqəddəs torpaqlarımızın düşmən işğalından azad edilməsi uğrunda gedən döyüşlərdə şəhidlik zirvəsinə yüksəlmiş Vətən Müharibəsi Qəhrəmanı Yusifli Azər Nazim oğlunun doğum günü ilə əlaqədar xatirəsi anılıb.
DSX-nin mətbuat mərkəzindən “Poliqon”a verilən məlumata görə, şəhidin doğulub boya-başa çatdığı Ağstafa rayonunun Böyük Kəsik kəndində keçirilmiş anım mərasimində Dövlət Sərhəd Xidmətinin rəsmiləri, rayon rəhbərliyi, şəhidin ailə üzvləri, yaxınları, eləcə də döyüş yoldaşları iştirak ediblər.
Şəhidin məzarı ziyarət olunmuş, önünə əklil qoyulub, ruhuna dualar oxunub.
Tədbir iştirakçıları Azərbaycan tarixinə qızıl hərflərlə yazılan Vətən müharibəsində Azərbaycan Prezidenti, Müzəffər Ali Baş Komandan İlham Əliyevin siyasi liderlik və sərkərdəlik məharətindən, Azərbaycan Silahlı Qüvvələrinin rəşadəti sayəsində qazanılmış möhtəşəm qələbədən danışıb, döyüşlərin başladığı ilk gündən qəhrəman oğulların sərhədçi andına sadiq qalaraq şücaət və fədakarlıq nümayiş etdirdiklərini, qarşıya qoyulan döyüş tapşırıqlarını canları bahasına layiqincə yerinə yetirərək şəhidlik zirvəsinə yüksəldiklərini vurğulayıblar.
Vətən müharibəsində Azərbaycan xalqına qələbə sevinci yaşatmış şəhidlərin əziz xatirəsinin hər zaman sonsuz ehtiram və minnətdarlıqla anılacağı, onların qəhrəmanlıq mirasının gələcək nəsillər üçün nümunə olacağı xüsusi qeyd edilib.
Şəhidin ailə üzvləri dövlət tərəfindən onlara göstərilən diqqət və qayğıya, torpaqların azad olunması uğrunda gedən döyüşlərdə canından keçən qəhrəman Vətən övladlarının xatirəsinin uca tutulduğuna görə minnətdarlıqlarını bildiriblər.
