ABŞ Hərbi Hava Qüvvələri MH-139A helikopterinin sınaqlarını tamamlayıb

ABŞ Hərbi Hava Qüvvələri (HHQ) altı aylıq ilkin əməliyyat sınaqları və qiymətləndirmə (IOT&E) proqramı çərçivəsində MH-139A “Grey Wolf” helikopterinin son uçuşunu tamamlayıb.

“Poliqon” “Boeing” şirkətinə istinadən xəbər verir ki, bu mərhələdə helikopterin nəzərdə tutulan missiyalar üçün əməliyyat effektivliyi və uyğunluğu qiymətləndirilib.

Bildirilib ki, sınaqların başa çatması ilə ABŞ HHQ müdafiə satınalmaları prosesində mühüm mərhələ olan IOT&E-ni rəsmi şəkildə yekunlaşdıraraq proqramı tammiqyaslı istehsala keçirmək qərarına yaxınlaşır.

Altı aylıq qiymətləndirmə dövründə xidmət qrupu tərəfindən helikopterin imkanları nümayiş etdirilib, onun əməliyyat mühitində texniki qulluq və saxlanma potensialı yoxlanılıb. Komanda logistika, texniki xidmət və dəstək sistemlərini uğurla idarə edərək helikopterin real şəraitdə etibarlı işləyə biləcəyini sübut edib.