ASELSAN 2024-cü ildə dəyəri 1 milyard dollardan çox olan ixrac müqavilələri imzalayıb
Türkiyənin ASELSAN şirkəti 2024-cü ildə ümumi dəyəri 1 milyard ABŞ dollarından çox olan ixrac müqavilələri imzalayıb.
ASELSAN-dan “Poliqon”a verilən məlumata görə, bu rəqəm şirkət tarixində rekord göstəricidir.
Bildirilib ki, birbaşa ixracın əvvəlki illə müqayisədə iki dəfə artaraq 217 milyon ABŞ dolları, quru, dəniz və hava platformaları vasitəsilə həyata keçirilən dolayı ixracın isə 291 milyon ABŞ dolları təşkil etməsi ASELSAN-ın qlobal bazarlarda artan təsirini nümayiş etdirir.
2024-cü ildə şirkət ilk dəfə 7 ölkə ilə müqavilə imzalayaraq, ASELSAN texnologiyasına etibar edən ölkələrin ümumi sayını 92-yə çatdırıb. Bundan başqa, ASELFLIR-500 kamerası, CENK dəniz radarı, FERSAH sonarı, GÖZDE və KGK tuşlama dəstləri də daxil olmaqla, 31 məhsul ilk dəfə ixrac edilib. Bunların arasında PUA-larda üstün performansı ilə seçilən yeni nəsil elektro-optik kəşfiyyat, müşahidə və hədəfləmə sistemi ASELFLIR-500 ilk istehsal ilində 16 ölkəyə satılıb.
2024-cü ildə altı fərqli ölkədə yeni ofis açan ASELSAN qlobal varlığını genişləndirərək 20 ölkəyə çatdırıb ki, bu da şirkətin son istifadəçilərə daha yaxşı xidmətlər təqdim etmək qabiliyyətini artırıb.
ASELSAN, Türkiyənin ilk yerli rabitə peyki olan TÜRKSAT-6A üçün Ku-Band və X-Band LOCUS kommunikasiya yüklərini təmin etməklə, dənizin dibindən kosmosun dərinliklərinə qədər bütün platformalara rabitə həlləri təqdim etmək qabiliyyətinə sahib olub.
ASELSAN-ın baş direktoru Ahmet Akyol şirkətin 2024-cü ildəki uğurunu qiymətləndirib. Onun sözlərinə görə, 2024-cü il ASELSAN üçün ölkədaxili və beynəlxalq səviyyədə yeni sifarişlər və tədarüklər baxımından əlamətdar il olub.
“Dünyanın ən sürətlə böyüyən 10 müdafiə şirkətindən biri olmağa nail olduq və bu, bizi “Defense News Top 100” siyahısında beş pillə irəliləməyə sövq etdi. Mən bütün bu nailiyyətləri gənc və istedadlı işçi qüvvəmizin fədakar əməyinin nəticəsi kimi görürəm və onların hər birinə bu heyrətamiz komandanın bir hissəsi olduğu üçün təşəkkür etmək istəyirəm”, – deyə A.Akyol qeyd edib.
Baş direktor 2025-ci ildə, yəni ASELSAN-ın 50 illik yubileyində şirkəti daha yüksək hədəflərin gözlədiyini vurğulayıb: “Biz aselsaneXt2030 adlandırdığımız 2030-cu il üçün strateji baxışımız çərçivəsində ən keyfiyyətli imkanlara və ən sürətli proseslərə malik ən yüksək texnologiyaları istehsal edərək onları dünyaya təqdim etməyə davam edəcəyik. Müdafiə sənayesi sahəsində əməliyyat səmərəliliyi və texnoloji liderlik üçün yeni standartlar müəyyən etməklə, müştərilərimizə innovativ, missiyaya yönəlmiş həllər təqdim etməyə davam edəcəyimizə inanıram”.
