AzTU-da TEKNOFEST-2022 festivalının təqdimatı keçirilib
Azərbaycan Texniki Universitetində (AzTU) 2022-ci ildə Azərbaycanda keçiriləcək dünyanın ən böyük aerokosmik və texnologiya festivalı TEKNOFEST-2022-nin təqdimatı keçirilib.
Bu barədə “Poliqon”a Azərbaycan Texniki Universitetinin mətbuat xidmətindən məlumat verilib.
Tədbirdə çıxış edən AzTU-nun rəqəmsallaşma və layihələr üzrə prorektoru Rəşad Əliyev festival barədə məlumat verib. Bildirib ki, AzTU TEKNOFEST-2022 festivalının Azərbaycandakı rəsmi tərəfdaşıdır. Rəşad Əliyev texnologiya sahəsində çalışan, bu sahəyə marağı olan hər kəsi festivalında iştiraka dəvət edib.
Daha sonra Rəqəmsal İnkişaf və Nəqliyyat Nazirliyinin TEKNOFEST ofisinin əməliyyat meneceri Zeynəb Babayeva təqdimatla çıxış edib. O, festivalda iştirak qaydaları və şərtlər, müsabiqələr, mükafat fondları və digər məlumatları tədbir iştirakçılarının diqqətinə çatdırıb. Qeyd edib ki, festivalda iştirak etmək istəyənlər bu və digər məlumatları daha ətraflı şəkildə https://teknofest.az/az/ saytından əldə edə bilərlər.
Sonda iştirakçıların sualları cavablandırılıb.
Qeyd edək ki, TEKNOFEST-2022 festivalı 26-29 may tarixlərində Bakıda “Crystal Hall” və Dənizkənarı Milli Parkda keçiriləcək.
