“BAE Systems” şirkəti süzən sursatlar, kamikadze tipli pilotsuz uçuş aparatları (PUA), antidron sistemləri, raketlər və pilotsuz yerüstü nəqliyyat vasitələri üçün xüsusi olaraq hazırlanmış “BlackThorn” adlı yeni nəsil çoxməqsədli, modul quruluşlu döyüş başlığını təqdim edib.
“Poliqon” “BAE Systems”ə istinadən xəbər verir ki, müasir münaqişələrin tələblərinə cavab vermək məqsədilə hazırlanan “BlackThorn”, müxtəlif platforma və sistemlərə asan inteqrasiya oluna bilən etibarlı və çevik sursat həlli kimi nəzərdə tutulub.
Bununla yanaşı, döyüş başlığı qısa müddətdə, geniş miqyasda və aşağı xərclə istehsal edilə bilir.
İstehsalçının bildirdiyinə görə, artıq yeni “BlackThorn” döyüş başlığı “Frankenburg” şirkətinin hazırladığı “Mark I” qısamənzilli zenit idarəolunan raketinə inteqrasiya edilmək üçün seçilib. Bu qərar şirkətlər arasında cari ilin əvvəlində imzalanmış əməkdaşlıq sazişindən sonra qəbul edilib.
“BlackThorn” modul və miqyaslana bilən konstruksiyaya malikdir. Döyüş başlığı 40 mm, 70 mm və 120 mm-lik variantlarında təqdim olunur və müxtəlif platformalara inteqrasiya edilə bilir. Onun modul arxitekturası partlayış, qəlpələnmə, çoxməqsədli təsir və zirehdəlmə kimi müxtəlif döyüş effektlərini birləşdirərək, çoxsaylı fərqli silah sistemlərinə ehtiyac olmadan missiyaya uyğun çevik döyüş yükü təmin edir.
“BlackThorn” qısa müddət ərzində geniş şəkildə modelləşdirmə, simulyasiya və rəqəmsal mühəndislik texnologiyalarından istifadə edilməklə hazırlanıb. Daha sonra isə onun imkanları genişmiqyaslı sınaq proqramı çərçivəsində təsdiqlənib.
