Britaniya Müdafiə Nazirliyi tərəfindən ANAMA-nın əməkdaşlarına təlimlər keçirilib
Böyük Britaniyanın Müdafiə Nazirliyi tərəfindən Azərbaycan Minatəmizləmə Agentliyinin (ANAMA) 13 nəfər partlayış qrupu işçilərinə keçirilən EOD level 3+ təlimləri başa çatıb.
Azərbaycan Minatəmizləmə Agentliyindən “Poliqon”a verilən məlumata görə, müvafiq təlimlərin keçirilməsi Agentliyin və Britaniyanın Azərbaycandakı səfirliyi arasında əldə edilən razılaşmaya əsasən təşkil olunub.
Məqsəd, humanitar minatəmizləmə fəaliyyətini icra edən Agentliyin əməkdaşlarının mina və partlamamış hərbi sursatların zərərsizləşdirilməsi zamanı qabaqcıl təcrübə və metodların tətbiqi imkanlarının artırılmasıdır. Beynəlxalq Minatəmizləmə Standartlarına (IMAS) uyğun olaraq təlimlər sahə işçilərinə davranış və təhlükəsizlik qaydalarının aşılanması, əldədüzəlmə və digər partlayıcı qurğuların iş prinsipi və zərərsizləşdirilməsi barədə yeni bilik və bacarıqlarının təkmilləşdirilməsini təmin edir. Təlimlərdə partlayış əməliyyatlarının planlaşdırılması, idarəedilməsi və tapşırıqların icrası fəaliyyəti də əhatə olunub.
Mina və hərbi sursatların zərərsizləşdirilməsinə dair təşkil olunan, Təhlükəsizlik və Partlayıcı maddələrin Tədrisi Beynəlxalq Məktəbi (International School of Security and Explosives Education, İSSEE) tərəfindən bir ay müddətində tədris edilən EOD 3+ təlimi ANAMA-nın Füzuli rayonunda yerləşən Horadiz Regional mərkəzində keçirilib.
ANAMA-nın təlim fəaliyyəti daxilində EOD level 3+ təlimlərinin təşkili və keçirilməsi imkanlarının əldə edilməsi məqsədilə Britaniyanın Müdafiə Nazirliyinin əməkdaşları tərəfindən Agentliyin təlim heyəti üçün Təlimçilərin Təlimi proqramının icrasına başlanılıb.
