Cənubi Koreya ABŞ-dan havadan erkən xəbərdarlıq və nəzarət təyyarələri alır

ABŞ Dövlət Departamenti 4.92 milyard dollar dəyərindəki E-7 havadan erkən xəbərdarlıq və nəzarət təyyarələrinin (AEW&C – Airborne Early Warning and Control) Cənubi Koreyaya satışını təsdiq edib.

Bu barədə “Poliqon” ABŞ-ın Müdafiə Təhlükəsizliyi Əməkdaşlıq Agentliyinə (DSCA) istinadən xəbər verib.

Bildirilib ki, sifarişə 4 ədəd E-7 AEW&C təyyarənin və digər lazımi avadanlıqların satın alınması, eləcə də onlara təmir, texniki xidmət və logistika dəstəyinin göstərilməsi daxildir.

Sözügedən sifarişin baş podratçısı ABŞ-ın “Boeing” şirkəti olacaq.

Qeyd olunub ki, bu satış ISR və havadan erkən xəbərdarlıq və nəzarət imkanlarını təmin etməklə Cənubi Koreyanın cari və gələcək təhdidlərə cavab vermək qabiliyyətini təkmilləşdirəcək.