Çin SWS3 adlı yeni zenit raket-top kompleksi inkişaf etdirib
Çin, alçaqdan uçan hava təhdidlərinə qarşı mübarizə aparmaq üçün yeni SWS3 zenit raket-top kompleksi inkişaf etdirib.
“Poliqon” “Defence Blog” nəşrinə istinadən xəbər verir ki, qısa mənzilli mobil hava hücumundan müdafiə (HHM) sistemi olan SWS3, dron, qanadlı raket və dəqiq idarə olunan sursatları zərərsizləşdirmək üçün nəzərdə tutulub.
Qeyd edilib ki, 6×6 və 4×4 təkər formullu zirehli nəqliyyat vasitəsi üzərində yerləşdirilən kompleksin silahlanmasına 35 mm-lik ikilüləli avtomatik top və “yer-hava” raketləri daxildir.
SWS3 kompleksi modul radar qurğuları və elektro-optik hədəfləmə cihazları vasitəsilə inteqrasiya olunmuş aşkarlama, izləmə və məhv etmə imkanları təqdim edir. Bu xüsusiyyətlər HHM sisteminin həm avtonom rejimdə, həm də şəbəkə daxilində birgə işləməsini təmin edir. Bu isə SWS3 vahidlərinin daha geniş laylı hava hücumundan müdafiə strukturlarına daxil edilməsinə imkan verir.
Kompleksin atəşi idarəetmə həlli “1+1 tutma” adlandırılan yanaşmanı dəstəkləyir. Bu, hava hədəflərinə qarşı həm top, həm də raket atəşinin koordinasiyalı şəkildə istifadəsini nəzərdə tutur. Sözügedən yanaşma eyni anda bir neçə hədəfin müxtəlif hündürlüklər və sürətlərlə hücum etdiyi sürü hücum ssenarilərində effektiv müdafiə təmin etməyi hədəfləyir.