Çexiyanın “Czechoslovak Group” (CSG) şirkəti Kanadanın qabaqcıl müdafiə texnologiyaları hazırlayan “North Vector Dynamics” (NVD) şirkətinin strateji investoru olub.
“Poliqon” CSG-yə istinadən xəbər verir ki, NVD hava hücumundan müdafiə sistemləri, yüksək dəqiqlikli idarəolunan raketlər, pilotsuz uçuş aparatlarına (PUA) qarşı mübarizə vasitələri və yeni nəsil hipersəs texnologiyalarının hazırlanması istiqamətində fəaliyyət göstərir.
Tərəflər investisiyanın maliyyə dəyərini açıqlamasalar da, sövdələşmədən sonra NVD şirkətinin dəyəri 90 milyon ABŞ dollarını ötüb.
CSG son illərdə radar texnologiyaları, hava hücumundan müdafiə sistemləri, avtonom sistemlər, raket və pilotsuz uçuş aparatları üçün hərəkətverici sistemlər, eləcə də digər qabaqcıl müdafiə texnologiyaları sahəsində fəaliyyətini genişləndirib. NVD tərəfindən hazırlanan həllərin CSG-nin mövcud texnologiya portfelini tamamlayaraq şirkətə yeni perspektivli imkanlar qazandıracağı vurğulanıb.
Səhmdar investisiyası ilə yanaşı, CSG şirkəti NVD-yə öz sənaye bazasını, mühəndislik təcrübəsini, şirkətin mövcud sistemlərinə inteqrasiya imkanlarını və geniş beynəlxalq satış şəbəkəsini təqdim edəcək. Əməkdaşlığın əsas məqsədi NVD-nin hazırladığı texnologiyaların kommersiyalaşdırılmasını sürətləndirmək və onların, xüsusilə NATO üzvü ölkələrdə tətbiqini genişləndirməkdir.
