DSX Akademiyasının 10-cu buraxılış mərasimi keçirilib
Mayın 8-də Dövlət Sərhəd Xidməti (DSX) Akademiyasının 10-cu buraxılışı münasibətilə mərasim keçirilib.
Dövlət Sərhəd Xidmətinin mətbuat mərkəzindən “Poliqon”a verilən məlumta görə, Azərbaycanın Dövlət Himninin ifasından və Döyüş Bayrağının meydana gətirilməsindən sonra gənc zabitlər təntənəli surətdə “Sərhədçi zabit andı”nı qəbul ediblər.
Diplomlar təqdim olunduqdan sonra bütün məzunlar adından çıxış edən leytenant Orxan Bağırov Azərbaycan Sərhəd Mühafizəsinin zabit heyətinə daxil olmaları ilə fəxr etmələrini bildirib, qalib ölkənin qürurlu sərhədçiləri olaraq üçrəngli Dövlət bayrağının vüqarla dalğalandığı müqəddəs sərhədlərin keşiyində hər zaman şərəflə dayanacaqlarını ifadə edib, sərhədçi peşəsinin sirrlərinə dərindən yiyələnməkdə, Akademiyanı uğurla başa vurmaqda əməyini əsirgəməyən zabit və müəllim heyətinə dərin minnətdarlığını bildirib. Daha sonra DSX Akademiyasının rəisi polkovnik Aqil Babayev çıxış edərək bütün tədbir iştirakçılarını təbrik edib.
Dövlət Sərhəd Xidmətinin rəisi general-polkovnik Elçin Quliyev Azərbaycanın sərhədçi zabiti adına layiq görülmələri münasibətilə məzunları təbrik edib, gənc leytenantların DSX-nin zabitləri sırasına daxil olduqları dövrün Azərbaycan Sərhəd Mühafizəsi tarixinin şərəfli dövrünə təsadüf etdiyini xüsusi vurğulayıb.
Prezident İlham Əliyevin rəhbərliyi altında Azərbaycanın Ermənistan üzərində parlaq qələbə qazanması, Vətən müharibəsinin Tarixi Zəfərlə bitməsi qeyd olunub.
Vətən müharibəsində DSX-nin qarşısında qoyulmuş döyüş tapşırıqlarının uğurla icra olunduğu, Azərbaycan sərhədçilərinin qəhrəmanlıq və qalibiyyət dastanı yazdıqları vurğulanaraq, müqəddəs savaşda həlak olmuş bütün qəhrəmanların və onların sırasında Dövlət Sərhəd Xidməti Akademiyasının məzunu olmuş 4 sərhədçi-zabitin xatirələri yad edilib.
Uzun illər ərzində döyüş və peşəkar hazırlıq, maddi-texniki təchizat, hərbi-vətənpərvərlik sahələrində tətbiq edilmiş sistemli və müasir yanaşmalar sayəsində əldə olunmuş nəticələrin Azərbaycan sərhədçilərinin Böyük Zəfərin qazanılmasında uğurlu iştirakına zəmin yaratdığı vurğulanıb.
Döyüş əməliyyatlarının ilk günündən Azərbaycan sərhədçilərinin 24 saat ərzində 105 kilometr məsafədə ildırımsürətli hücumunun hərb salnamasinə yazılması, düşmənin yüzlərlə canlı qüvvəsi və döyüş texnikasının məhv edilməsi, Qədim Xudafərin körpüsündə, Zəngilan rayonunun Ağbənd qəsəbəsində və Zəngilan şəhərində Dövlət bayrağının sancılması, Ermənistanla dövlət sərhədində “Bartaz” və “Şükürataz” strateji yüksəkliklərinin qəhrəmancasına azad edilməsi xüsusi qeyd olunub.
Milli dövlətçiliyə, Azərbaycanın Prezidentinə sadiqliyi ilə seçilən sərhədçilərin xidmətlərini İlham Əliyevin xüsusi qiymətləndirməsinin şəxsi heyəti yeni xidməti qələbələrə ruhlandırdığı vurğulanıb.
“Vətən Müharibəsi Qəhrəmanı” adına layiq görülmüş sərhədçilərdən 4 zabitin DSX Akademiyasının məzunu olmaları, bu cür qəhrəmanların yetişdirilməsi və tərbiyələndirilməsində DSX Akademiyasının pedaqoji və komandir heyətinin xüsusi rolu qeyd edilib.
Çıxışda dövlətin ərazi bütövlüyü təmin edildikdən, Ermənistan ilə dövlət sərhədi işğaldan azad edildikdən sonra bu ərazilərdə zəruri sərhəd müdafiə və mühafizə infrastrukturunun yaradılması, hərbi qulluqçuların xidməti şəraitinin və sosial təminatının yaxşılaşdırılması üzrə görülən kompleks tədbirlər, o cümlədən son 2 ay ərzində bu istiqamətlərdə 10 yeni hərbi hissənin xidməti-döyüş fəaliyyətinə başlaması, may ayının sonunadək daha 6 yeni hərbi hissənin təmir-tikintisinin yekunlaşacağı barədə məlumat verilib, işğaldan azad olunmuş dövlət sərhədlərimizin mühafizə altına götürülməsinə gənc sərhədçi-zabitlərin öz önəmli töhfələrini verəcəklərinə, dövlət sərhədlərinin keşiyində ayıq-sayıq dayanacaqlarına əminlik ifadə edilib.
Mərasim başa çatdıqdan sonra DSX Akademiyasının məzunları ilə xatirə fotoşəkli çəkdirilib.
Daha sonra gənc zabitlər Ulu Öndər Heydər Əliyevin məzarını və Şəhidlər Xiyabanını ziyarət edib, Hərbi Qənimətlər Parkında olublar.
