İsrailin “Elbit Systems” şirkəti adı açıqlanmayan beynəlxalq müştəri ilə qabaqcıl kəşfiyyat, müşahidə, hədəf aşkarlama və hədəfləmə faydalı yüklərinin tədarükünə dair müqavilələr imzalayıb.
“Poliqon”un “Elbit Systems”ə istinadən verdiyi xəbərə görə, ümumi dəyəri təxminən 270 milyon ABŞ dolları olan müqavilələr qarşıdakı altı il müddətində həyata keçiriləcək.
Müqavilələr çərçivəsində şirkətin SPECTRO ailəsinə daxil olan çoxspektrli elektro-optik ISTAR (Intelligence, Surveillance, Target Acquisition and Reconnaissance) sistemləri tədarük ediləcək.
SPECTRO sistemləri orta dalğalı infraqırmızı (MWIR – Mid-Wave Infrared), görünən və qısa dalğalı infraqırmızı (SWIR – Short-Wave Infrared) yüksək dəqiqlikli görüntüləmə kanallarını, qabaqcıl lazer hədəfləmə imkanlarını və süni intellekt əsaslı analitika texnologiyalarını özündə birləşdirir. Bu imkanlar hava, dəniz və quru platformalarında hədəflərin qabaqcıl identifikasiyasına, izlənməsinə və uzun məsafədən kəşfiyyat məlumatlarının toplanmasına şərait yaradır. Sistemlər kompakt konstruksiyaya malik olmaqla, gecə və gündüz, eləcə də əlverişsiz hava şəraitində fəaliyyət göstərə bilir.
Bundan əlavə, “Elbit Systems” hava platformalarında ISR missiyaları üçün SPECTRO ailəsinə daxil olan AMPS NG sistemlərini də tədarük edəcək.
Qabaqcıl görüntüləmə kanalları ilə təchiz olunan AMPS NG sistemləri MWIR, görünən və SWIR sensorlarının, qabaqcıl təsvir emalı və yüksək dəqiqlikli coğrafi koordinatların müəyyənləşdirilməsi texnologiyalarının inteqrasiyası hesabına son dərəcə uzaq məsafələrdə hədəflərin aşkarlanması, müşahidəsi və geolokasiyasını təmin edir.
Qeyd edilib ki, bu sistemlər mürəkkəb əməliyyat mühitlərində strateji ISR və hədəfləmə missiyalarının həyata keçirilməsini dəstəkləyəcək.
