“Embraer” Macarıstan HHQ-yə C-390 “Millennium” təyyarələrinin tədarükünü tamamlayıb

Braziliyanın “Embraer” şirkəti Macarıstan Hərbi Hava Qüvvələrinə (HHQ) ikinci C-390 “Millennium” çoxməqsədli nəqliyyat təyyarəsini təhvil verib.

“Poliqon” “Embraer”ə istinadən xəbər verir ki, bununla da şirkət Macarıstan HHQ-yə C-390 təyyarələrinin tədarükünü tamamlayıb.

Qeyd edilib ki, Macarıstan müqavilə üzrə nəzərdə tutulan bütün C-390 təyyarələrini tam təhvil alan ilk ölkədir. Eyni zamanda, Macarıstan NATO daxilində bu təyyarədən istifadə edən ikinci operatorudur.

Yeni nəsil C-390 “Millennium” çoxməqsədli nəqliyyat təyyarəsi tibbi təxliyə, humanitar dəstək, axtarış-xilasetmə, yük və şəxsi heyət daşınması, dəqiq hava yükləmələri, paraşütçü əməliyyatları və havadan-havaya yanacaq doldurma tapşırıqları da daxil olmaqla, geniş çeşiddə hərbi və mülki missiyaları yerinə yetirə bilir.