İranın F-5 təlim-döyüş təyyarəsi qəzaya uğrayıb
İran Hərbi Hava Qüvvələrinə məxsus F5 təlim-döyüş təyyarəsi Təbriz şəhərində qəzaya uğrayıb.
“Poliqon”un “Tasnim” xəbər agentliyinə istinadən verdiyi məlumata görə, qəza nəticəsində təyyarədə olan iki pilot həlak olub.
Bildirilib ki, təlim məqsədilə istifadə edilən F-5 tipli təyyarə təlim missiyasından qayıdarkən Təbrizin Monjem bulvarında yerləşən “Şəhid Əlipur” idman zalının üzərinə düşüb.
Təyyarənin qəzaya düşməsinə ilkin səbəb kimi texniki nasazlıq göstərilib. Hazırda araşdırma aparılır.
Qeyd edək ki, ötən il də İranın Xuzistan əyalətinin Dezful şəhərindəki aviasiya bazasında F-5 təlim-döyüş təyyarəsində yaranan texniki nasazlıq nəticəsində iki pilot ölüb. F-5 təyyarəsini uçuşa hazırlayan pilotların anqarda təyyarəyə baxışı zamanı texniki nasazlıq səbəbindən katapult aktivləşmiş, nəticədə iki pilot anqarın tavanına çırpılaraq həlak olmuşdu.
