“Kalaşnikov” konserni PUA və süzən sursatlarını Belarusda sərgiləyəcək
Rusiyanın “Kalaşnikov” konserni 2025-ci il 21–24 may tarixlərində Belarusun paytaxtı Minsk şəhərində keçiriləcək 12-ci MILEX Beynəlxalq Silah və Hərbi Texnika Sərgisində (MILEX-2025) öz məhsullarını təqdim edəcək.
Bu barədə “Poliqon” “Kalaşnikov” konserninə istinadən xəbər verib.
Sərgidə iştirakla bağlı fikirlərini bölüşən “Kalaşnikov”un baş direktoru Alan Luşnikov bildirib ki, konsern Belarusa əsasən xüsusi hərbi əməliyyat zonasında sınaqdan keçirilmiş məhsullarını aparır: “İlk növbədə bunlar pilotsuz uçuş aparatları və atıcı silahlardır. Biz, süzən sursatların ən yeni nümunəsi olan KUB-2 və artıq özünü sübut etmiş KUB-1-i SKAT 350 M kəşfiyyat PUA-sı ilə birlikdə təqdim edəcəyik. Qeyd edim ki, KUB-ların SKAT ilə birgə istifadəsi xüsusi hərbi əməliyyat zonasında və sərhədyanı bölgələrdə son dərəcə yüksək effektivlik nümayiş etdirmişdir. Onlar haqqında rəylər yalnız müsbətdir, buna görə də bu kompleks həlli tərəfdaşlarımıza fəal şəkildə təklif edirik”
KUB-E və KUB-2-E süzən sursatları stasionar (KUB-E) və hərəkətdə olan (KUB-2-E) hədəflərin məhv edilməsi üçün effektiv vasitələrdir. Bu sursatlar aşağı akustik görünürlük, sadə istifadə, yüksək gizlənmə qabiliyyəti, eləcə də tez yerləşdirmə, buraxılış və toplanma sürəti ilə seçilir. Bundan əlavə, KUB-lar qruplarla (sürü) – yəni bir yerüstü idarəetmə məntəqəsindən eyni anda dörd ədəd süzən sursatın buraxılması ilə tətbiq oluna bilər.
“KUB” ailəsinin süzən sursatları “Kalaşnikov” konserninin istehsalı olan və öz sinfində ən yaxşı səssiz kəşfiyyat PUA-larından biri sayılan SKAT 350 M ilə asanlıqla inteqrasiya oluna bilir. SKAT 350 M PUA çətin iqlim şəraitində, geniş temperatur diapazonunda ərazi kəşfiyyatı və quru əməliyyatlarının müşayiəti üçün nəzərdə tutulub.
Kopter tipli kəşfiyyat vasitələri olan mikro PUA “Karakurt” və mini PUA “Goliaf” xüsusi tapşırıqların günün istənilən vaxtında yerinə yetirilməsi üçün nəzərdə tutulub. Onlar real vaxt rejimində kəşfiyyat məlumatlarını ötürə bilir, siqnal itkisi zamanı bazaya qayıdır və fövqəladə hallar zamanı təhlükəsiz eniş həyata keçirirlər. “Goliaf” PUA-sı bölük tərkibindəki hərbi qulluqçular tərəfindən istifadə üçün, “Karakurt” isə fərdi istifadə üçün təyin edilib.
“Kvazimaçta” aparat qaldırma sistemi, kopter tipli PUA əsasında qurulmuş, yüksək hündürlükdə yerləşdirilən platformada radioelektron avadanlıqların (faydalı yük) uzunmüddətli işləməsini təmin etmək üçün nəzərdə tutulub. Sistem, dövlət sərhədi boyunca operativ vəziyyətin fasiləsiz monitorinqi üçün yüksək effektivliyə malikdir.