MKE məhsullarını beynəlxalq müdafiə sərgilərində təqdim edib
Türkiyənin “Makine ve Kimya Endüstrisi” (MKE) şirkəti 11-14 noyabr tarixləri arasında Malinin paytaxtı Bamakoda keçirilən BAMEX və 10-13 noyabr tarixləri arasında Taylandın paytaxtı Banqkokda təşkil olunan “Defense & Security 2025” sərgilərinə qatılıb.
MKE-dən “Poliqon”a verilən məlumata görə, şirkət bu sərgilərdə geniş sursat ailəsi və güclü silah sistemləri ilə yanaşı, bir çox ölkənin yaxından izlədiyi innovativ həllərini də təqdim edib.
BAMEX sərgisində MKE stendini ziyarət edən Malinin baş naziri Abdoulaye Maiqa, Sudan Müdafiə Sənayesi İdarəsinin (MASAD) sədri Margani İdries Suliman və Malinin Xüsusi Qüvvələr komandanı Karim Diabate MKE məhsullarını yoxlayaraq, silah və patron istehsal prosesləri barədə məlumat alıblar.
Türkiyənin Bamako səfiri Efe Ceylan və Müdafiə Sənayesi Komitəsinin sədr müavini Gökhan Uçar da MKE stendində görüşlərdə iştirak ediblər.
Mali Mülki Müdafiə və Təhlükəsizlik naziri Daoud Aly Mohammedine, Baş Qərargah rəisi Oumar Diarra və Baş Polis rəisi Youssouf Kone və digər heyətlər, BAMEX sərgisi çərçivəsində keçirilən atış tədbirində, türk mühəndislərinin imzasını daşıyan MKE-739 və PMT-76 silahları ilə atışlar həyata keçiriblər.
“Defense & Security 2025” sərgisində Tayland Hərbi Dəniz Qüvvələrinin (HDQ) komandanı admiral Oairote Fuanchan və heyəti MKE stendini ziyarət edib. Admiral, MKE-nin inkişaf etmiş müdafiə həllərini incələyərək məhsullar barədə ətraflı məlumat alıb.
Bundan başqa, MKE ilə İndoneziya mərkəzli “PT. Mandira Jaya Abadi” şirkəti arasında İndoneziya Xüsusi Qüvvələr Komandanlığının ehtiyacına uyğun MP5-A3 tapança-pulemyotlarının tədarükü ilə bağlı müqavilə imzalanıb.
Tayland sərgisində MKE stendini ziyarət edən Malayziya Quru Qoşunları komandanı Muhammad Hafizuddeain Bin Jantana TOLGA antidron sistemi və digər innovativ həllər barədə geniş məlumat təqdim olunub.
