Pakistan Çindən J-10C qırıcıları alıb
Pakistan Çin istehsalı olan 25 ədəd çoxməqsədli J-10C döyüş təyyarəsi alıb.
“Poliqon” xəbər verir ki, bu barədə Pakistanın daxili işlər naziri Şeyx Rəşid Əhməd bildirib.
Nazirin sözlərinə görə, Çindən alınan 25 ədəd J-10C döyüş təyyarəsi 2022-ci il mart ayının 23-də Pakistanın “Müstəqillik Günü” münasibəti ilə keçiriləcək hərbi paradda nümayiş etdiriləcək. Onun sözlərinə görə, Pakistan Hərbi Hava Qüvvələrinin silahlanmasına veriləcək J-10C-lərin Hindistanın “Rafale” döyüş təyyarələrinə qarşı istifadə olunması nəzərdə tutulub.
Çinin “Chengdu Aircraft Industry Group” (CAIG) şirkəti tərəfindən dizayn və istehsal edilən dördüncü nəsil çoxməqsədli J-10C döyüş təyyarəsi hər cür hava şəraitində xidmət aparmaq qabiliyyətinə malikdir. Döyüş təyyarəsi Rusiya və Çin (lisenziyalı) istehsalı olan “NPO Saturn” mühərrikləri ilə təchiz edilib.
Rizvan Fikrətoğlu
