Pakistan və Səudiyyə Ərəbistanı JF-17 qırıcılarının tədarükü ilə bağlı danışıqlar aparır

İslamabad və Ər-Riyad Səudiyyə Ərəbistanının Pakistana verdiyi təxminən 2 milyard ABŞ dolları məbləğində kreditin JF-17 qırıcı təyyarələrinin alışı üzrə müqaviləyə çevrilməsi barədə danışıqlar aparır.

“Poliqon” “Reuters”ə istinadən xəbər verir ki, bu barədə pakistanlı mənbələr bildirib.

Qeyd edilib ki, bu addım ötən il iki ölkə arasında imzalanmış qarşılıqlı müdafiə paktından bir neçə ay sonra hərbi əməkdaşlığın daha da dərinləşdiyini göstərir.

Danışıqlar Pakistanın ciddi maliyyə çətinlikləri ilə üzləşdiyi və Səudiyyə Ərəbistanının ABŞ-ın Yaxın Şərqdəki öhdəliklərinə dair qeyri-müəyyənlik fonunda təhlükəsizlik tərəfdaşlıqlarını yenidən formalaşdırdığı bir dövrdə iki müttəfiqin müdafiə sahəsində əməkdaşlığı əməli müstəviyə keçirmək niyyətini vurğulayır.

Mənbələrdən biri bildirib ki, danışıqlar yalnız JF-17 “Thunder” qırıcılarının təminatı ilə məhdudlaşır. Bu, Pakistan və Çin tərəfindən birgə hazırlanmış və Pakistanda istehsal olunan yüngül döyüş təyyarəsidir. Digər mənbə isə JF-17-lərin bir neçə variant arasında əsas seçim olduğunu deyib.

Birinci mənbə ümumi müqavilə dəyərinin 4 milyard dollar olduğunu, əlavə 2 milyard dolların isə kredit konvertasiyasından digər avadanlıq və təchizat üçün xərclənəcəyini açıqlayıb. Hər iki mənbə hərbi strukturlara yaxın olduqları və rəsmi açıqlama vermək səlahiyyətinə malik olmadıqları üçün anonimlik şərti ilə danışıb.

Pakistan Ordusu, Maliyyə və Müdafiə nazirlikləri sorğulara dərhal cavab verməyib. Səudiyyə hökumətinin media ofisi də şərh sorğusunu cavabsız qoyub.

Xatırladaq ki, Pakistan Hərbi Hava Qüvvələrinin komandanı Zahir Əhməd Baber Sidhu bu həftə Səudiyyə Ərəbistanında olub. O, səudiyyəli həmkarı general-leytenant Turki bin Bander bin Abdulaziz ilə ikitərəfli müdafiə əməkdaşlığı, regional təhlükəsizlik mühiti və gələcək əməkdaşlıq imkanları barədə müzakirələr aparıb.