Rusiyanın “Roselektronika” holdinqi “Serp-VS6” antidron sistemini ilk dəfə Səudiyyə Ərəbistanının paytaxtı Ər-Riyadda keçiriləcək 2-ci “World Defense Show” (WDS-2024) sərgisində nümayiş etdirəcək.
“Poliqon” “Roselektronika”ya istinadən xəbər verir ki, “Serp” antidron sistemləri ailəsinə daxil olan “Serp-VS6” holdinqin “Vektor” Elmi-Tədqiqat İnstitutu tərəfindən hazırlanıb.
Yeni “Serp-VS6” antidron sistemi obyektləri həm tək, həm də sürü halında fəaliyyət göstərən dronlardan qorumağa qadirdir. Sistem birbaşa radio görünmə şəraitində bir neçə PUA-nı eyni vaxtda 5 km-ə qədər məsafədə basdıra və 90 dərəcə azimut sektorlarında işləyə bilər.
“Serp-VS6”nın radio monitorinq avadanlığı idarəetmə siqnalları ilə dron və onun operatorunu müəyyən etməyə imkan verir. Antidron sisteminin passiv rejimdə işləməsi onu digər radio avadanlıqları üçün görünməz edir.
