Rusiyada zirehli texnikalar üçün yeni mühafizə sistemi yaradılıb
Rusiyada silahlanmada olan və perspektiv zirehli texnikaları yüksək dəqiqlikli silahlardan qorumaq üçün yeni döyüş sursatı hazırlanıb.
“Poliqon” “Rostex” Dövlət Korporasiyasının mətbuat xidmətinə istinadən xəbər verir ki, yeni məmulat “TsNIIToçmaş” mütəxəssisləri tərəfindən hazırlanıb.
Yeni döyüş sursatı, zirehli texnikaları aerozol-dipol maneə pərdəsi yaratma üsulu ilə yüksək dəqiqlikli silahlardan qorumaq üçün təyin edilib. Təhlükə vəziyyətində, döyüş sursatı atılır və düşmənin idarə olunan silahlarının idarəetmə sistemləri “kor” edilir.
Yaradıcıların sözlərinə görə, yeni məmulatla artıq silahlanmaya qəbul edilmiş analoji döyüş sursatları arasındakı əsas fərq, onun kombinələşdirilmiş pərdəsinin sıxlığının 1,5 dəfə çox olmasıdır. Yeni döyüş sursatı zirehli texnikaları lazer, optik, termal və radiolokasiya tuşlamalı döyüş sursatlarından müdafiə edə bilir.
Yeni döyüş sursatının çapı 76 mm , kütləsi isə 2.8 kiloqramdır. Döyüş sursatı həm silahlanmada olan, həm də silahlanmaya qəbul edilməyə hazırlanan perspektivli zirehli texnikaların müdafiə sistemlərinin bir hissəsi kimi tətbiq edilə bilər.
Yeni döyüş sursatlarının dövlət sınaqlarının bu il başa çatdırılması və “Armiya-2021” beynəlxalq forumunda hərbçilərə təqdim olunması planlaşdırılır.
Qeyd edək ki, “TsNIITochmash”ın zirehli texnikaların yüksək dəqiqlikli idarə olunan döyüş sursatlarından qorunması üçün yeni kompleks hazırladığı barədə ilk dəfə 2019-cu ildə bildirilib.
Əhəd Əzizov