Su-57 qırıcısı ilk dəfə “İzdelie 177” mühərriki ilə havaya qalxıb – VİDEO
Rusiya istehsalı Su-57 döyüş təyyarəsi ilk dəfə olaraq beşinci nəsil perspektivli “İzdelie 177” mühərriki ilə havaya qalxıb.
Bu barədə “Poliqon” Rusiyanın “Birləşmiş Aviasiya Korporasiyası”na (UAC) istinadən xəbər verib.
Bildirilib ki, “Birləşmiş Aviasiya Korporasiyası” və “Birləşmiş Mühərrikqayırma Korporasiyası” (UEC) beşinci nəsil Su-57 qırıcısına inteqrasiya edilən “İzdelie 177” mühərrikinin uçuş sınaqlarına başlayıblar.
Sınaq zamanı “İzdelie 177” mühərriki ilə havaya qalxan Su-57 qırıcısı uçuş tapşırığının şərtlərini standart rejimdə və problemsiz şəkildə həyata keçirib.
“Su-57 real döyüş şəraitində özünü çox yaxşı tərəfdən göstərib və beşinci nəsil aviasiya komplekslərinə qoyulan tələblərə, o cümlədən “stealth” xüsusiyyətləri baxımından tam cavab verdiyini təsdiqləyib. Təyyarə xarici sifarişçilər arasında haqlı olaraq yüksək maraq doğurur və artıq onun ixrac tədarükləri həyata keçirilir. Bununla yanaşı, Su-57 xüsusi hərbi əməliyyat zonasındakı tətbiq təcrübəsi nəzərə alınmaqla modernləşdirilməyə davam edir: silahlanma imkanları və bort sistemləri genişləndirilir. Artırılmış dartı qüvvəsinə malik yeni “İzdelie 177” mühərriki uçuş xüsusiyyətlərini əlavə olaraq yaxşılaşdıracaq və təyyarənin gələcək təkmilləşdirilməsi üçün ciddi ehtiyat yaradacaq”, – deyə “Rostex” Dövlət Korporasiyası tərəfindən qeyd edilib.
Su-57 qırıcısı geniş spektrli döyüş tapşırıqlarının yerinə yetirilməsi üçün yaradılıb. O, hava, quru və dəniz hədəflərini məhv etmək qabiliyyətinə malikdir. Təyyarə sutka ərzində, o cümlədən mürəkkəb meteoroloji şəraitdə və güclü radioelektron maneələr fonunda fəaliyyət göstərə bilir. Aşağı görünmə xüsusiyyəti ona müasir HHM sistemlərinin qarşıdurması şəraitində belə hədəfləri məhv etməyə imkan verir.
Perspektivli “İzdelie 177” mühərriki UEC tərəfindən beşinci nəsil aviasiya komplekslərində istifadə üçün yaradılıb. Yeni mühərrikdə forsaj rejimində itələmə qüvvəsi 16000 kq təşkil edir. Eyni zamanda, mühərrik bütün rejimlərdə azaldılmış yanacaq sərfiyyatına və artırılmış resurs göstəricilərinə malikdir.
Hazırda “Birləşmiş Aviasiya Korporasiyası” istehsal imkanlarının genişləndirilməsi proqramını həyata keçirir. Bu, qırıcının qoşunlara tədarük həcmini artırmağa, eyni zamanda Su-57-ni ixrac variantında xarici sifarişçilərə aktiv şəkildə təklif etməyə imkan verəcək.