TEI şirkəti ABŞ Donanmasının LM2500 mühərriklərinə texniki xidmət göstərəcək

Türkiyənin “TUSAŞ Motor Sanayii A.Ş.” (TEI) şirkəti ABŞ Donanmasının LM2500 dəniz qaz turbinlərinin depo səviyyəsində texniki xidmətini və yenidən baxımını həyata keçirəcək.

“Poliqon” TEI-yə istinadən xəbər verir ki, bununla bağlı tərəflər 45.6 milyon ABŞ dolları dəyərində müqavilə imzalanıb.

2026-cı ilin oktyabr ayına qədər davam edəcək müqaviləyə əsasən, ABŞ Donanması tərəfindən istifadə edilən LM2500 mühərrikləri üçün depo səviyyəsində texniki xidmət və yenidən baxım fəaliyyətləri 14 ay ərzində TEI-nin müəssisələrində aparılacaq.

Qeyd edək ki, 2023-cü ildə TEI şirkəti ilə mühərrik istehsalçısı olan “GE Marine” arasında müqavilə imzalanıb. Bu müqavilə ilə TEI-nin qlobal səviyyədə LM2500 mühərriklərinə baxım, təmir və təftiş xidmətləri göstərəcək mərkəz olması üçün ilk addım atılıb.