![Azərbaycan Ordusunun Baş Qərargah rəisi Pakistan Xüsusi Xidmətlər Qrupu diviziyasında olub Azərbaycan Ordusunun Baş Qərargah rəisi Pakistan Xüsusi Xidmətlər Qrupu diviziyasında olub](https://poliqon.az/wp-content/uploads/2023/05/6594dfd2bbe7546cf19104fb5c1a38f2.jpg)
Azərbaycan Ordusunun Baş Qərargah rəisi Pakistan Xüsusi Xidmətlər Qrupu diviziyasında olub
Pakistanda rəsmi səfərdə olan müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyevin rəhbərlik etdiyi nümayəndə heyəti bu ölkənin Xüsusi Xidmətlər Qrupu (SSG) diviziyasında olub.
Bu barədə “Poliqon”a Müdafiə Nazirliyinin mətbuat xidmətindən məlumat verilib.
SSG diviziya komandiri general-mayor Adil Rəhmani nümayəndə heyətinə diviziyanın təyinatı və təlim prosesi haqqında ətraflı məlumat verib. Bildirilib ki, diviziyanın şəxsi heyəti xüsusi təyinatlılardan ibarətdir və əsasən əks-terror, mühüm hədəflərin aşkar edilməsi, girovların azad edilməsi, informasiya, psixoloji və bir sıra digər xüsusi əməliyyatlara cəlb olunur.
Sonra SSG-nin təlim ərazisi ilə tanışlıq keçirilib, diviziyanın sərəncamında olan silah və texnika, habelə digər hərbi təyinatlı vasitələr nümayəndə heyətinə nümayiş etdirilib.
Görüşdə Azərbaycanın Pakistandakı Fövqəladə və Səlahiyyətli səfiri Xəzər Fərhadov da iştirak edib.