“Lockheed Martin” şirkəti ABŞ-ın Alabama ştatının Troy şəhərində yeni sursat istehsalı mərkəzinin təməlini qoyub.
“Poliqon” “Lockheed Martin”ə istinadən xəbər verir ki, bu addım şirkətin ABŞ və müttəfiqləri üçün sursat istehsalını genişləndirməyə yönəlmiş investisiyasıdır.
Yeni mərkəz şirkətə təxminən 8100 kvadrat metr istehsal sahəsi qazandıracaq. Müəssisə əsasən THAAD (Terminal High Altitude Area Defense) tutucu raketlərinin istehsalını dəstəkləyəcək, eyni zamanda gələcək “Next Generation Interceptor” (NGI) proqramı üçün də istehsal imkanları yaradacaq.
“Lockheed Martin” 2030-cu ilə qədər müdafiə istehsal gücünü artırmaq üçün 9 milyard dollardan çox investisiya planlaşdırır. Şirkət artıq ABŞ ərazisində 20-dən çox yeni və genişləndirilmiş istehsal müəssisəsi üzərində işləyir. Bu layihələr artan qlobal sursat tələbatının qarşılanmasına yönəlib.
THAAD raketləri ABŞ ilə yanaşı, Birləşmiş Ərəb Əmirlikləri və Səudiyyə Ərəbistanı tərəfindən də istifadə olunur. O, həm atmosfer daxilində, həm də atmosferdən kənarda hədəfləri məhv edə bilən qabaqcıl tutucu raket kimi tanınır.
