ABŞ Kosmik Qüvvələri raket izləmə peyk imkanları ilə təmin olunacaq

Böyük Britaniyanın “BAE Systems” şirkəti ABŞ Kosmik Qüvvələrinə raket izləmə peyk imkanları təmin edəcək.

“Poliqon” “BAE Systems”ə istinadən xəbər verir ki, bunun üçün şirkət ABŞ-ın Kosmik Sistemlər Komandanlığı tərəfindən 1.2 milyard dollarlıq müqaviləyə layiq görülüb.

Bildirilib ki, “BAE Systems” “Dayanıqlı Raket Xəbərdarlığı və İzləmə – Orta Yer Orbiti Epoch 2” (Resilient Missile Warning & Tracking (RMWT) – Medium Earth Orbit (MEO) Epoch 2) proqramının baş podratçısı kimi çıxış edəcək və bu müqavilə çərçivəsində 10 peyk istehsal edəcək.

Müqavilədə dörd il müddətində kosmik vasitələrin təhvil verilməsi, o cümlədən beş il ərzində əməliyyat və dəstək xidmətlərinin göstərilməsi nəzərdə tutulur.

Bu proqram ABŞ Kosmik Qüvvələrinə ballistik raketlər və hipersəs sürətli planerlər kimi qabaqcıl təhlükələrin davamlı izlənməsi və xəbərdarlığı üçün kosmosda möhkəm və dayanıqlı sistem təmin edəcək.

“BAE Systems”, həmçinin peyk qrupunu idarə edəcək yerüstü sistem də hazırlayacaq. Sözügedən sistemə missiya idarəetməsi, əməliyyat həlləri, komanda və idarəetmə (C2) daxildir.