“Altın Kıran-2024” təlimində kəşfiyyat və basqın tapşırıqları yerinə yetirilib
Azərbaycan və Qazaxıstanın Müdafiə nazirlikləri arasında imzalanmış birgə plana əsasən, Qazaxıstanın Almatı vilayətinin Jarkent şəhərində yerləşən “Koktal” təlim poliqonunda keçirilən “Altın Kıran-2024” (“Qızıl Qartal – 2024”) birgə taktiki-xüsusi təlimi davam edir.
Müdafiə Nazirliyinin Mətbuat Xidmətindən “Poliqon”a bildirilib ki, ssenariyə əsasən, döyüş tapşırığı alan bölmə komandirləri qəbul edilmiş qərarı təlim rəhbərliyinin qərargahına məruzə etdikdən sonra kəşfiyyat tapşırıqlarını icra ediblər.
Təlimdə 25 kilometr məsafədə seçilmiş travers üzrə hərəkət edən bölmələr dağlıq ərazidə gizlənən qeyri-qanuni silahlı birləşmələrin sığınacaqlarını müəyyənləşdirərək basqın edib. Qanunsuz silahlıların avtomobil texnikası kolonlarının pusquya salınması və canlı qüvvəsinin məhv edilməsinə, eləcə də qarşıya çıxan digər qəfil tapşırıqların müvəffəqiyyətlə yerinə yetiriliməsinə nail olunub.
“Altın Kıran-2024” təlimində əsas diqqət Azərbaycan-Qazaxıstan hərbi qulluqçularının qarşılıqlı əlaqədə birgə fəaliyyətinin təşkilinə, kəşfiyyat bölmələrinin praktiki vərdişlərinin təkmilləşdirilməsinə, dağlıq və səhra ərazilərində maskalanma bacarıqlarının artırılmasına, həmçinin qarşılıqlı təcrübə mübadiləsinin aparılmasına yönəldilib.
