“Arpan155” özüyeriyən artilleriya qurğusunun kvalifikasiya sınağı keçirilib

ASFAT şirkətinin baş podratçılığı ilə ASELSAN, MKE ve BMC şirkətləri tərəfindən birgə istehsal edilən “Arpan155” özüyeriyən artilleriya qurğusunun (ÖAQ) kvalifikasiya sınağı keçirilib.

“Poliqon” ASFAT-a istinadən xəbər verir ki, sınaq zamanı “Arpan155” ÖAQ dəqiqədə 6 atış yerinə 8 atış edərək testi uğurla tamamlayıb.

8×8 taktiki təkərli nəqliyyat vasitəsinə inteqrasiya edilmiş “Arpan155”, mobil artilleriya texnologiyasında inqilabi bir mərhələ hesab olunur. Bu ÖAQ yüksək atəş gücü ilə yanaşı, üstün taktiki manevr qabiliyyətini eyni anda təmin edir. “Arpan155” sürətli şəkildə fərqli mövqelərə yerləşmə və düşmən hədəflərinə yüksək dəqiqliklə atəş açma qabiliyyəti ilə seçilir.

ÖAQ 155 mm 52 kalibrli silahla təchiz olunub və NATO standartlarına uyğun olan bütün 155 mm-lik mərmilərlə uyğunluq göstərir. Atəş sürəti dəqiqədə 6 atıma çatır. Əlavə olaraq, 7.62 mm-lik ikinci silahla da silahlandırılıb. Silahın yüksəlmə bucağı -3 dərəcədən +69 dərəcəyədəkdir ki, bu da ona müxtəlif hədəf bucaqlarında effektiv atəş açmaq imkanı verir.

80 km/saat maksimal sürətə çata bilən “Arpan155”, 600 km-lik hərəkət məsafəsi və 447 kVt (600 at gücü) olan mühərriki ilə uzunmüddətli və çətin əməliyyatlarda belə etibarlı fəaliyyət göstərir. O, avtomatik transmissiya ilə təchiz olunub. Sistemin atəşə hazırlanma müddəti 2 dəqiqədən az, mövqe dəyişmə müddəti isə yenə 2 dəqiqədən azdır. Ümumilikdə 24 mərmi daşımaq qabiliyyətinə malikdir. “Arpan155” həm zirehli qoruma, həm də çevikliyi ilə müasir döyüş meydanlarında istifadəçilərə effektiv və etibarlı artilleriya dəstəyi təqdim edir.