ASELSAN Ər-Riyadda “Sager-100” termal nişangahını nümayiş etdirir

Səudiyyə Ərəbistanında keçirilən “World Defense Show-2024” (WDS-2024) sərgisində Türkiyənin ASELSAN şirkəti “Sager-100” termal nişangahını nümayiş etdirir.

“Poliqon” “Army Recognition”a istinadən xəbər verir ki, bu termal nişangah modifikasiya tələb etmədən Rusiyanın “Kornet-E” tank əleyhinə idarə olunan raket (TƏİR) kompleksinə quraşdırıla bilər.

Sınaqlardan uğurla keçən “Sager-100” müxtəlif əməliyyat şəraitlərində optimal performans üçün soyutmalı termal kameraya malikdir. O, uzun məsafə imkanları ilə tanınır. Termal nişangahın asan daşınması və özünü təmin edən enerji mənbəyinə malik olması onun müxtəlif ssenarilərə uyğunlaşma qabiliyyətini artırır.

Texniki xüsusiyyətlərinə 640×512 ayırdetmə qabiliyyətinə malik soyudulmuş detektor, 2x-ə qədər elektron zum və tənzimlənən baxış sahəsi seçimləri daxildir. 4 saatdan çox fasiləsiz işləyə bilən “Sager-100”ün batareyası ilə birlikdə kütləsi 7 kq-dan azdır. Termal nişangah davamlılıq üçün MIL-STD-810G standartlarına cavab verir və istismar zamanı -30°C-dən +55°C-dək temperatura  tab gətirir.