Bakıda İranın Müqəddəs Müdafiə Həftəsinin 41-ci ildönümü ilə bağlı tədbir keçirilib.
“Poliqon”un məlumatına görə, mərasimdə Azərbaycannın Müdafiə və Müdafiə Sənayesi nazirliklərinin, Dövlət Sərhəd Xidmətinin yüksək vəzifəli nümayəndələri, xarici ölkələrin Azərbaycandakı səfirləri və hərbi attaşeləri, media mənsubları iştirak ediblər.
İranın Azərbaycandakı hərbi attaşesi Cavad Furutəni 41 il əvvəl İraqın keçmiş diktatoru Səddam Hüseyn rejiminin hərbi təcavüzünə qarşı İranın müdafiəsindən danışıb.
Hərbi attaşe İran xalqının bu müharibədən qalib çıxdığını, Səddam rejiminin təcavüzkarlıq niyyətinin baş tutmadığını qeyd edib.
“İranın Azərbaycanla yaxşı münasibətləri var və bu əməkdaşlıq getdikcə daha da inkişaf edir. İran Azərbaycanın öz torpaqlarına olan suveren hüquqlarını hər zaman müdafiə edir”, – deyə Cavad Furutəni vurğulayıb.
Tədbirdə çıxış edən İranın Azərbaycandakı səfiri Seyid Abbas Musəvi bildirib ki, 8 il davam edən İran və İraq müharibəsi zamanı heç bir ölkə İrana silah satmayıb, nəticədə İranda hərbi sənaye özünü təminat istiqamətində inkişaf edib: “Bu gün İran hərbi imkanların müxtəlif istiqamətlərində uğur və irəliləyiş əldə edib. Bura quru, hava, dəniz və kiber sahələr aiddir.
Həmçinin raket sistemləri istiqamətində əhəmiyyətli inkişafa nail olunub. İranın hərbi gücü hər zaman regionun təhlükəsizliyi, stabilliyi və dostları üçün olub və olacaq”.
