Belarus “Sapsan” mobil antidron kompleksini Afrika ölkələrinə təklif edib

Belarus “Sapsan” mobil antidron kompleksini adı açıqlanmayan iki Afrika ölkəsinə təklif edib.

“Poliqon” “Defence Blog” nəşrinə istinadən xəbər verir ki, əgər tərəflər arasında müqavilə imzalanarsa, ilk antidron kompleksləri 2025-ci ilin noyabr ayında müştərilərə təhvil verilə bilər.

“Sapsan” mobil antidron kompleksi kritik əhəmiyyətli obyektləri kiçik pilotsuz uçuş aparatlarından (PUA) qorumaq üçün nəzərdə tutulub. Kompleks, avtomatlaşdırılmış rejimdə PUA-ların axtarışını, aşkarlanmasını, izlənməsini, elektron söndürülməsini və vurularaq məhv edilməsini həyata keçirir.

Belarus Silahlı Qüvvələri tərəfindən istismara qəbul olunmuş MZKT-500-200-010 taktiki yük maşınının şassisi üzərinə quraşdırılan “Sapsan” açıq sistem arxitekturasına malikdir ki, bu da ona müxtəlif sistemlərin (radar, elektro-optik, elektron kəşfiyyat, döyüş modulu və s.) inteqrasiyasına imkan verir.

Qeyd edək ki, Belarus Dövlət Hərbi Sənaye Komitəsi tərəfindən “Sapsan” mobil antidron kompleksi 21-24 may tarixlərində Minsk şəhərində keçiriləcək MILEX-2025 XII Beynəlxalq Silah və Hərbi Texnika Sərgisində nümayiş etdiriləcək.