Çexiya ən müasir “Leopard” tankları alacaq
Almaniya Çexiyaya 20 ədəd “Leopard 2A4” tankı hədiyyə edə və 40 ədəd ən müasir “Leopard 2A7” tankı sata bilər.
“Poliqon” xəbər verir ki, bu barədə Çexiyanın müdafiə naziri Yana Çernoxova bildirib.
Bəzi KİV-lərin Çexiyanın 1960-cı illərdən bəri istehsal edilmiş köhnə “Leopard 1” tanklarını alması ilə bağlı fərziyyələri hələ təsdiqlənməyib.
Hazırki təklifin sxemi isə belədir: Çexiya tankların təxminən üçdə birini hədiyyə olaraq pulsuz, qalan üçdə ikisini isə satın alacaq. Hədiyyə edilən “Leopard 2A4” variantında zireh olmalıdır. Bu tamamilə ən yeni olmasa da, Çexiyanın təkmilləşdirilmiş T72M4 tankları ilə müqayisə ediləndir və ya hətta onları üstələyir. Bundan başqa bildirilib ki, T72M4 tankları hazırda VOP CZ müəssisəsində təmir olunur və döyüşə hazır deyil. İanə sayəsində Çexiya Ordusu tez bir zamanda fəaliyyət göstərən tank parkına sahib olacaq.
Bunun ardınca isə, Bundesverin istifadə etdiyi, həmçinin Macarıstan və Danimarka tərəfindən də satın alınan, ən müasir versiya olan 40 ədəd “Leopard 2A7” tankları gəlməlidir. Bu tanklar “Leopard” tankının ilkin istehsalçısı olan KMW (Krauss-Maffei Wegmann GmbH & Co KG) şirkətinin və müqavilədə əhəmiyyətli paya malik olan Çexiya müdafiə sənayesi şirkətlərinin birgə əməkdaşlığı ilə hazırlanmalıdır.
“Leopard” tankları bir neçə səbəbə görə Çexiya Ordusu üçün müasir tankın ən effektli variantıdır. Hazırda Avropada “Leopard” tanklarından başqa heç bir tank istehsal olunmur, yalnız Almaniyanın KMW şirkətində tank texnikalarının istehsalı üçün işlək xətt var.
Sözügedən tanklar “Leopard 2A4” və daha yüksək versiyalarda Slovakiyadan başqa Çexiya ilə qonşu olan bütün ölkələrdə istifadə olunur. Və böyük ehtimalla Çexiya da bu yolla gedəcək. Qeyd etmək lazımdır ki, Avropa orduları Böyük Britaniyanın “Challenger” və ya Fransanın “Leclerc” kimi başqa tanklardan istifadə etsə də, onların istehsalı artıq dayandırılıb. ABŞ-ın “Abrams” və ya Cənubi Koreyanın K2 tankları kimi qeyri-Avropa variantları isə məntiqli deyil, çünki onlar uzaq istehsalçıdan asılılıq yaradırlar. Polşanın “Abrams” tanklarını alması isə ABŞ ilə strateji tərəfdaşlığı dərinləşdirmək üçün qəbul edilmiş siyasi qərar kimi qiymətləndirilir.
Bir çox ekspertlərin sözlərinə görə tank texnikasının əhəmiyyətini Ukraynadakı müharibə də təsdiqləyir. Tank ərazini fəth edə və müdafiə edə bilən birbaşa döyüş üçün ən güclü quru silahıdır. Piyada, artilleriya və hava qüvvələri ilə birlikdə yerləşdirildikdə son dərəcə təsirli olur. Rusiya ordusunun əsasən T-72 tankının müxtəlif variantları ilə təmsil olunan tank texnikaları dəhşətli itkilərə məruz qalır. Çexiya ordusunun hələ də arsenalında saxladığı rus tanklarının başqa bir problemi isə sursatın bilavasitə qüllədə saxlanması konsepsiyasıdır. Bir müdaxilə halında, bu, demək olar ki, həmişə tankın və heyətin məhvinə səbəb olur.
Çexiya Ordusunun tank parkının “Leopard” tankları şəklində modernləşdirilməsi də Qərb ordularının Əfqanıstanı tərk etməsindən sonra strateji konsepsiyanın dəyişməsinin ifadəsidir. Bu, ekspedisiya əməliyyatları üçün deyil, ərazini qorumaq üçün istifadə edilən silahdır.
Əhəd Əzizov