Filippin Ordusunun zirehli texnikaları təkmilləşdirilib
Əsaslı təmir və modernizasiya olunmuş 6 ədəd ACV-300 və 7 ədəd “Simba” zirehli döyüş maşını Filippin Ordusunun istismarına verilib.
“Poliqon” xəbər verir ki, bu barədə Filippin Müdafiə Nazirliyinin mətbuat xidməti məlumat yayıb.
Bildirilib ki, modernizasiya çərçivəsində tırtıllı şassiyə sahib ACV-300-lər müasir rabitə, naviqasiya və silah sistemləri, 4×4 təkər formuluna malik “Simba”lar isə yeni mühərrik ilə təchiz olunub. Bununla “Simba” zirehli döyüş maşınlarının hərəkət və manevr qabiliyyətləri artırılıb.
Qeyd edək ki, ACV-300-lər döyüş imkanlarının artırılması üçün Türkiyənin FNSS şirkətindən alınan yeni SABER döyüş modulu ilə silahlandırılıb. Bu silah sisteminin alınması üçün şirkət və Filippin Müdafiə Naziriliyi arasında müqavilə 2020-ci ilin sonunda imzalanıb.
Müqaviləyə əsasən, Filippin Türkiyədən SABER döyüş modulunun 12.7 mm-lik iri çaplı pulemyot / 7.62 mm-lik pulemyot və 40 mm-lik top / 7.62 mm-lik pulemyot olmaqla iki versiyasını satın alıb. Döyüş modulunun bundan başqa 25 mm-lik M242 “Bushmaster” avtomatik topu və 7.62 mm-lik pulemtyot ilə silahlandırılmış modeli də var.
Paylaşılan fotolardan göründüyü kimi döyüş modulu artıq sifarişçiyə təhvil verilib və ordunun zirehli texnikalarına inteqrasiya edilərək xidmət göstərməyə başlayıb.
