İspaniya Silahlı Qüvvələri üçün 81 mm-lik minaatanlar alınır
“Rheinmetall Expal Munitions” şirkəti İspaniya Silahlı Qüvvələrinə 81 mm-lik “Eimos” minaatan sistemlərini tədarük edəcək.
“Poliqon” “Rheinmetall” şirkətinə istinadən xəbər verir ki, bununla bağlı “Rheinmetall Expal Munitions” və İspaniya hökuməti arasında 150 milyon avro dəyərində müqavilə imzalanıb.
Müqaviləyə əsasən, 81 mm-lik minaatan sistemlərinin İspaniya Silahlı Qüvvələrinə təhvil verilməsinə 2024-cü ilin sonundan başlanacaq və 2027-ci ilin sonuna qədər yekunlaşdırılacaq.
“Rheinmetall Expal Munitions” istehsalı olan 81 mm-lik “Eimos” minaatanları platforma əsaslı sistemlərdir. Onlar İspaniya Ordusu, Hərbi Dəniz Qüvvələri və Hərbi Hava Qüvvələri tərəfindən istifadə ediləcək.
Qeyd edək ki, İspaniyada fəaliyyət göstərən “Rheinmetall Expal Munitions” Almaniya mərkəzli “Rheinmetall” şirkətinin törəməsidir.