Norveçin KONGSBERG şirkəti ABŞ-ın raket istehsalçısı olan “Zone 5” şirkətinin satın alınması prosesini tamamlayıb.
“Poliqon” KONGSBERG-ə istinadən xəbər verir ki, satınalma ilə bağlı müqavilə ABŞ tənzimləyici qurumlarının təsdiqindən sonra rəsmən qüvvəyə minib.
ABŞ-ın Kaliforniya ştatında yerləşən “Zone 5” şirkəti münasib qiymətli və kütləvi istehsal oluna bilən döyüş sursatları sahəsində bazarın liderlərindən hesab olunur. Şirkət “Rusty Dagger” və “White Spike” raketləri də daxil olmaqla, müxtəlif tip tutucu raketlərin hazırlanması və istehsalı ilə məşğuldur.
KONGSBERG-in prezidenti və baş direktoru Eirik Lie bildirib ki, son münaqişələr böyük həcmdə istehsal edilə bilən müdafiə vasitələrinin əhəmiyyətini açıq şəkildə nümayiş etdirib. Onun sözlərinə görə, “Zone 5” şirkətinin KONGSBERG-in tərkibinə qoşulması korporasiyanın məhsul portfelini zənginləşdirəcək və şirkətin beynəlxalq bazarlarda daha sürətli inkişafına şərait yaradacaq.
Qeyd olunub ki, KONGSBERG hava hücumundan müdafiə və zərbə sistemləri sahəsində aparıcı şirkətlərdən biri kimi “Zone 5” məhsullarının beynəlxalq bazarlara çıxışını dəstəkləyəcək. “Zone 5”in məhsul xətti KONGSBERG-in mövcud sistemlərini tamamlayır və onlarla inteqrasiya oluna bilir.
Müqavilə çərçivəsində KONGSBERG “Zone 5” şirkətinin səhmlərinin 90 faizini əldə edib. Bu şirkət fəaliyyətini təsisçisi və baş direktor Tomas Akersin rəhbərliyi altında davam etdirəcək. “Zone 5” satınalmadan sonra da müstəqil törəmə müəssisə kimi fəaliyyət göstərəcək.
