“Otokar” COBRA II zirehli ambulansını ADEX-2024-də nümayiş etdirir
Türkiyənin “Otokar” şirkəti 5-ci dəfə qapılarını açan Azərbaycan Beynəlxalq Müdafiə Sənayesi Sərgisi ADEX-2024-də COBRA II zirehli ambulansını nümayiş etdirir.
“Poliqon” xəbər verir ki, “Otokar” sərgidə dünyaca məşhur zirehli maşınlarını və quru sistemlərindəki üstün imkanlarını da iştirakçılara, rəsmi nümayəndə heyətlərinə və ziyarətçilərə təqdim edir.
“Otokar” Türkiyədə və dünyanın müxtəlif bölgələrində əldə etdiyi təcrübələri müştərilərinin dəyişən ehtiyaclarına uyğun olaraq davamlı şəkildə avtomobil inkişaf etdirmə səylərinə yönəldir. Mühəndislik gücü, innovativ dizayn qabiliyyəti və qabaqcıl texnologiya inteqrasiyası sahəsində təcrübəsi ilə günümüzün və gələcəyin təhlükəsizlik təhdidlərinə cavab verən həllər istehsal edir. NATO və Birləşmiş Millətlər Təşkilatının quru sistemləri təchizatçılarından biri olan “Otokar”ın hərbi maşınları dünyanın müxtəlif yerlərində, bir çox fərqli missiya, iqlim və ərazi şəraitində xidmət göstərir. “Otokar”ın beş qitədə 40-dan çox ölkədə 33 mindən artıq hərbi maşını istifadı olunur. Bu nəqliyyat vasitələri çətin şərtlərdə yüksək performans və təhlükəsizlik təklif etməklə ən kritik missiyalarda lazım olan dəstəyi təmin edir.
“Otokar”ın Azərbaycan ilə uzunmüddətli əməkdaşlığı mövcuddur. 1990-cı illərdən Azərbaycanın müdafiə ehtiyaclarına cavab verən “Otokar” bu illər ərzində müxtəlif növ hərbi maşınlarını Azərbaycana ixrac edib. Azərbaycan Silahlı Qüvvələrinin inventarında yer alan “Otokar”ın zirehli maşınları uğurlu performansları ilə diqqət çəkir.
COBRA II
ADEX sərgisində ambulans versiyası nümayiş etdirilən COBRA II 4×4 taktiki təkərli zirehli nəqliyyat vasitəsi yüksək qoruma və daşıma səviyyəsi, böyük daxili həcmi ilə seçilir. Üstün hərəkət qabiliyyətindən əlavə, komandir və sürücü də daxil olmaqla 10 personalı daşımaq bacarığına malik olan COBRA II ballistik, mina və ƏPQ (əldəqayırma partlayıcı qurğu) təhlükələrinə qarşı üstün mühafizə xüsusiyyəti sayəsində yüksək səviyyəli təhlükəsizlik təklif edir. Ən çətin relyef və iqlim şəraitində yüksək performans təmin edən COBRA II tələb olunan müxtəlif tapşırıqlara mükəmməl şəkildə uyğunlaşır.
Geniş çeşidli silah inteqrasiyası və missiya avadanlığı seçimləri sayəsində xüsusilə üstünlük verilən COBRA II modul quruluşu sayəsində personal daşıyıcısı, silah platforması, quru müşahidə radarı, KBRN kəşfiyyat vasitəsi, komanda idarəetmə maşını və ambulans kimi xidmət edə bilir.
COBRA II Zirehli Ambulansı
“Otokar” şirkəti COBRA II zirehli nəqliyyat vasitəsinin ambulans versiyasını ilk dəfə IDEF-2019 sərgisində nümayiş etdirib. COBRA II zirehli ambulansı özünün yüksək ballistik mühafizəsi və minaya qarşı qoruması ilə fərqlənir. COBRA II bu parametrləri ilə yüksək təhlükəli ərazilərdə standart bir ambulans ilə görüləcək bütün müdaxilələri yerinə yetirmək qabiliyyətindədir.
COBRA II zirehli ambulansı döyüş sahəsinin içərilərinə qədər girib, təhlükəli bölgədə yaralıların həyatını qurtarmaq və təcili müdaxilə xidmətlərini yerinə yetirə bilmək üçün zəruri avadanlıqlarla təchiz olunub. Ambulans versiyada COBRA II-nin hündürlüyü və genişliyi artırılıb, bununla da böyük daxili həcm təmin edilib. Arxa qapı təcili yardım istifadəsi üçün xüsusi bir rampa formasına salınıb. COBRA II zirehli ambulansın sürücü, komandir, tibb heyətindən başqa, 2 oturulu və 1 uzanılmış yaxud 2 uzanıqlı yaralı daşıya bilən iki fərqli konfiqurasiyası mövcuddur.
Modul strukturu ilə istifadəçilərin müxtəlif ehtiyaclarına cavab verən COBRA ll hazırda dünya üzrə 20-dən çox son istifadəçiyə uğurla xidmət göstərir.
