Pentaqon Ukraynaya yeni hərbi yardımların siyahısını açıqlayıb

29 Sentyabr 2022 10:31

ABŞ Müdafiə Nazirliyi rəsmi olaraq Ukraynaya yeni hərbi yardımların siyahısını dərc edib.

“Poliqon” ABŞ Müdafiə Nazirliyinin mətbuat xidmətinə istinadən bildirir ki, ABŞ Ukraynaya 18 ədəd HIMARS YARS, 340 ədəd avtomobil, 22 ədəd radar və digər avadanlıq verəcək.

“Ukraynanın Təhlükəsizliyinə Yardım Təşəbbüsü” (“Ukraine Security Assistance Initiative” – USAI) çərçivəsində Ukraynaya 1,1 milyard ABŞ dolları yardım göstərilir.

Bu yardım paketi Ukraynaya orta və uzunmüddətli perspektivdə əlavə prioritet imkanlar təqdim etmək üçün müqavilələrin bağlanması prosesinin başlanğıcıdır.

Xüsusilə, Ukrayna Silahlı Qüvvələrinin ehtiyacları üçün 18 ədəd M142 “HIMARS” (High Mobility Artillery Rocket Systems) reaktiv yaylım atəşi sistemi (YARS) tədarük ediləcək.

Həmçinin siyahıya daxildir:

150 ədəd zirehli yüksək hərəkətli çoxməqsədli təkərli nəqliyyat vasitəsi (HMMWV – High Mobility Multipurpose Wheeled Vehicles);
silahları yedəyə almaq üçün 150 ədəd taktiki maşın;
ağır texnikaların daşınması üçün 40 ədəd yük maşını və 80 ədəd qoşqu;
pilotsuz uçuş aparatları (PUA) üçün 2 ədəd radar;
20 ədəd çoxməqsədli radar;
PUA əleyhinə hava sistemləri;
müdafiə olunan rabitə sistemləri, müşahidə sistemləri və optika;
partlayışa təhlükəli əşyaların zərərsizləşdirilməsi üçün avadanlıq;
zirehli jiletlər və digər səhra təchizatı;
təlim, texniki xidmət və dəstək maliyyələşdirilməsi.