Qətər Fransadan döyüş təyyarələri alıb
Fransanın “Dassault Aviation” şirkəti tərəfindən Qətər Hərbi Hava Qüvvələrinə (HHQ) 4 ədəd çoxfunksiyalı “Dassault Rafale DQ” döyüş təyyarəsi çatdırılıb.
“Poliqon” xəbər verir ki, bu barədə “Dassault Aviation” şirkəti məlumat yayıb.
2015-ci ilin may ayında Qətərlə Fransanın “Dassault Aviation” şirkəti arasında 24 ədəd dördüncü nəsil çoxfunksiyalı “Dassault Rafale” təyyarəsinin alınması ilə bağlı dəyəri 6,3 milyard avro olan müqavilə imzalanıb. 2017-ci il dekabrın 7-də isə əlavə 12 ədəd “Rafale” təyyarəsinin çatdırılması sifariş verilib.
Son sifariş üzrə Qətərə ilk döyüş təyyarəsi 2020-ci ilin aprelində çatdırılıb.
Qeyd edək ki, “Rafale” döyüş təyyarəsi Fransa və Qətər ilə yanaşı, Hindistan, Misir kimi ölkələrin HHQ-ləri tərəfindən istifadə olunur. “Rafale” Əfqanıstan, Liviya, Mali, İraq və Suriya döyüşlərində istifadə edilib.
Rizvan Fikrətoğlu