“Roketsan” şirkəti qabaqcıl raket və HHM sistemlərini Əbu-Dabidə sərgiləyir
Türkiyənin “Roketsan” şirkəti qabaqcıl məhsul və xidmətlərini Əbu-Dabi şəhərində keçirilən IDEX-2025 Beynəlxalq Müdafiə Sərgisi və Konfransında nümayiş etdirir.
“Poliqon” xəbər verir ki, “Roketsan”ın sərgidə nümayiş etdirdiyi yeni məhsulların sırasına LG-155 lazerlə idarə olunan artilleriya sursatı, L-OMTAS lazerlə idarə olunan orta mənzilli tank əleyhinə raket sistemi, LUMTAS-GM artırılmış məsafəyə sahib lazerlə idarə olunan uzun mənzilli tank əleyhinə raket sistemi, “hava-yer” tipli İHA-122 və İHA-230 səsdən sürətli ballistik raketləri, “Burç” mobil hava hücumundan müdafiə (HHM) sistemi, MİDLAS buraxıcı qurğusu, “yer-hava” tipli SİPER Blok 1 və Siper Blok 2 tutucu raketləri daxildir.
Bunlardan başqa, şirkət tərəfindən IDEX-2025 sərgisində SOM raketi, “Çakır” qanadlı raketi, “yer-yer” tipli TRLG-122 və TRLG-230 raket sistemləri, “Mete” idarə olunan mini raketi, “Cirit” tank əleyhinə idarə olunan raketi, KARAOK tank əleyhinə raket kompleksi, KMC-U silah sistemi, “Sungur” daşınan zenit-raket kompleksi və s. məhsullar nümayiş olunur.
Türkiyə Quru Qoşunlarının ən əhəmiyyətli zərbə gücü olan artilleriya sistemləri üçün hazırlanmış LG-155 lazerlə idarə olunan artilleriya sursatı 25 kilometrə qədər mənzilə və 22 kiloqramlıq döyüş başlığına malikdir.
Lazerlə idarə olunan orta mənzilli tank əleyhinə raket sistemi L-OMTAS yarı aktiv lazer arayıcı başlığı ilə hədəflərini dəqiqliklə vuracaq. Üç ayaqlı platformalardan buraxıla biləcək L-OMTAS tanklar, zirehli maşınlar və beton bunkerlər kimi sərt hədəfləri məhv edəcək.
SİPER zenit-raket sistemi (ZRS) tərəfindən istifadə edilən SİPER Blok 1 və Siper Blok 2 tutucu raketləri düşmənin təyyarələrini, helikopterlərini, PUA-larını, qanadlı və “hava-yer” raketlərini zərərsizləşdirmək üçün nəzərdə tutulub. SİPER Blok 1 raketinin uzunluğu 5.4 metr, diametri 370 mm və mənzili 100+ kilometrdir. Siper Blok 2 raketinin isə uzunluğu 6.3 m, diametri 630 mm və mənzili 150+ km-dir.
