Rusiya KUB-SM PUA kompleksini ilk dəfə Əbu-Dabidə təqdim edəcək

Rusiyanın “Kalaşnikov” konserni 17-21 fevral tarixlərində Əbu-Dabidə keçiriləcək IDEX-2025 sərgisində yeni KUB-SM (SM – supermanevr) pilotsuz uçuş aparatları (PUA) kompleksini ilk dəfə təqdim edəcək.

“Poliqon” “Kalaşnikov”a istinadən xəbər verir ki, kompleksə zərbə və kəşfiyyat tipli olmaqla, iki növ KUB-SM pilotsuz uçuş aparatı, zirehli döyüş maşını, yerüstü idarəetmə stansiyası, nəqliyyat və buraxılış konteynerləri daxildir.

Qeyd olunub ki, yerüstü idarəetmə stansiyası ilə nəqliyyat və buraxılış konteynerləri zirehli döyüş maşınının şassisi üzərində quraşdırılıb. Bu sayədə PUA-lar həm zirehli döyüş maşınındakı nəqliyyat və buraxılış konteynerlərində daşınır, həm də yerüstü idarəetmə stansiyasıda operatorlar tərəfindən idarə olunur.

Ümumilikdə 16 konteynerin 14-ündə zərbə, ikisində isə kəşfiyyat tipli KUB-SM pilotsuz uçuş aparatı yerləşdirilib. Hər iki növ PUA növbə ilə zirehli döyüş maşınında yerləşdirildikləri konteynerlərdən buraxılır.

Kompleksin tərkibindəki kəşfiyyat tipli KUB-SM PUA ərazinin müşahidəsi və kəşfiyyatını həyata keçirir, əldə edilən məlumatı yerüstü idarəetmə stansiyasına ötürür. Müxtəlif döyüş başlığı ilə təchiz edilə bilən zərbə tipli KUB-SM isə təyin olunan hədəfi məhv edir.

KUB-SM PUA kompleksi düşmənin canlı qüvvəsini, zirehsiz və yüngül zirehli texnikalarını, zenit-raket komplekslərini, artilleriya və minaatan batareyalarını, hərbi aerodromlarındakı helikopter, təyyarə və PUA-larını, yerüstü idarəetmə stansiyalarını, elektron müharibə sistemlərini vurmaq üçün nəzərdə tutulub.

Kompleks günün istənilən vaxtında, çətin meteoroloji şəraitdə və küləyin sürəti 15 m/s-ə qədər olan havalarda belə supermanevrli KUB-SM PUA-ların istifadəsini təmin edir.