“HAN Sistem” şirkəti tərəfindən hazırlanmış BARAN antidron sistemi və yeni nəsil insansız platformalar SAHA 2026 sərgisində təqdim olunub.
“Poliqon” xəbər verir ki, sərgidə şirkətin nümayiş etdirdiyi yeni nəsil silah podları, avtonom vasitələr və BARAN antidron sistemi diqqət mərkəzində olub.
Yaxın döyüş üçün nəzərdə tutulmuş BARAN antidron sistemi 6 lüləli, elektrik ötürücülü quruluşa malikdir. Radar və süni intellekt (AI) dəstəkli hədəf aşkarlama sistemi ilə təchiz olunan BARAN, dəqiqədə 1000 atəş aça bilən silah sistemi ilə 100-200 metr effektiv əməliyyat məsafəsi təqdim edir.
KARAHAN pod sistemi isə yaxın hava dəstəyi əməliyyatları üçün hazırlanıb və həm pilotlu, həm də pilotsuz platformalara inteqrasiya oluna bilir. CKR-503 “Gatling” tipli silahla təchiz edilən sistem 400 ədəd sursat daşıma qabiliyyətinə malikdir.
Həmçinin nümayiş olunan KANGAL avtonom yerüstü robotu çətin relyef şəraitində fəaliyyət göstərmək üçün hazırlanmış 4×4 təkərli şassiyə sahibdir. Pilotsuz hava və yerüstü vasitələr ilə birgə əməliyyatlar icra edə bilən KANGAL, 500 kilometr əməliyyat mənzilinə və 300 kiloqram faydalı yük daşıma qabiliyyətinə malikdir.
