Fransanın “Thales” şirkəti Hərbi Dəniz Qüvvələri (HDQ) üçün nəzərdə tutulan “Maritime Modular Capability” adlı konteyner tipli mobil missiya sistemini təqdim edib.
“Poliqon” “Thales”ə istinadən xəbər verir ki, sistem HDQ-lərin dəyişən əməliyyat tələblərinə çevik uyğunlaşmasını, missiya imkanlarının sürətlə yerləşdirilməsini və müxtəlif platformalarda istifadəsini təmin etmək üçün hazırlanıb.
“Maritime Modular Capability” modulları gəmilərdə, insansız platformalarda və quruda yerləşdirilə bilər. Sistemin modulyar arxitekturası platformaların yeni missiya tələblərinə uyğun yenidən konfiqurasiya edilməsinə, dəyişən təhdidlərə və əməliyyat prioritetlərinə operativ uyğunlaşmasına imkan verir. Bu zaman platformada əsaslı konstruktiv dəyişikliklərin aparılmasına ehtiyac qalmır.
“Thales”in təqdim etdiyi konfiqurasiya şirkətin müxtəlif texnologiyalarını vahid 20 futluq konteynerdə birləşdirir. Beləliklə, konteyner müstəqil fəaliyyət göstərə bilən kompleks sistemlər sistemi kimi çıxış edir.
Sistem müşahidə və kəşfiyyat, atəşin idarə edilməsi, naviqasiya və rabitə imkanlarını özündə birləşdirir. Müşahidə və kəşfiyyat funksiyaları radarlar, sonarlar və radioelektron mübarizə sistemləri daxil olmaqla qabaqcıl sensorlar vasitəsilə həyata keçirilir. Atəşin idarə edilməsi isə TACTICOS döyüş idarəetmə sistemi vasitəsilə məsafədən təmin olunur.
