Türkiyənin milli döyüş gəmisi layihəsi MİLGEM çərçivəsində inşa edilən 10-cu və 11-ci gəmilərdə istifadə olunacaq HAVELSAN şirkətinin FLEETSTAR gəmi məlumat paylama sistemi (GVDS – gemi veri dağıtım sistemi) zavod qəbul sınaqlarından uğurla keçib.
Bu barədə “Poliqon” HAVELSAN şirkətinə istinadən xəbər verib.
Bildirilib ki, ilk GVDS sistemini 16 il əvvəl MİLGEM layihəsinin birinci gəmisi olan TCG HEYBELİADA-ya təhvil verən HAVELSAN ötən müddət ərzində sistemlərini müxtəlif siniflərə aid çoxsaylı dəniz platformalarına inteqrasiya edərək mühüm təcrübə əldə edib. Sonuncu tədarük də MİLGEM layihəsinin 10-cu və 11-ci gəmilərinə edilib.
Milli imkanlarla hazırlanan FLEETSTAR GVDS sualtı qayıqlarda sualtı qayıq məlumat paylama sistemi (DBDS – Denizaltı Bilgi Dağıtım Sistemi) adı ilə fəaliyyət göstərir. Müasir dəniz platformalarının rəqəmsal onurğa sütununu təşkil edən bu sistemlər sensorlar, silahlar və missiya sistemləri arasında məlumat mübadiləsini yüksək etibarlılıqla idarə edərək platformanın effektiv şəkildə tapşırıqları yerinə yetirməsinə imkan yaradır.
GVDS və DBDS sistemləri xidmət göstərdikləri platformalarda fasiləsiz fəaliyyət göstərir və əməliyyat fəaliyyətlərinin davamlılığında mühüm rol oynayır. Əldə edilən yüksək əlçatanlıq göstəriciləri məhsul ailəsinin real istismar şəraitində uğurlu fəaliyyətini nümayiş etdirir.
Yüksək məlumat trafiki, intensiv əməliyyat tempi və ətraf mühitin təsirləri altında belə fasiləsiz fəaliyyət göstərəcək şəkildə layihələndirilən FLEETSTAR GVDS dəniz əməliyyat mühitinin çətin şərtlərində də yüksək effektivliklə işləyə bilir.
Platformanın “ürəyi” kimi xarakterizə edilən bu sistem ümumi məlumat infrastrukturu üzərində sistemlərin koordinasiyalı fəaliyyət göstərməsinə imkan yaradır. Platformadakı kritik məlumatların doğru zamanda və lazımi sistemlərə çatdırılması sistemin əsas funksiyalarından biridir.
HAVELSAN GVDS/DBDS məhsul ailəsində istifadə olunan elektron kartların böyük hissəsini öz imkanları ilə hazırlayır, proqram təminatı və mexaniki layihələndirmə işlərini isə tamamilə öz mühəndislik imkanları əsasında həyata keçirir. Uzun illərdir müxtəlif platformalarda xidmət göstərən sistemlər yüksək etibarlılıq göstəriciləri ilə Türkiyə Hərbi Dəniz Qüvvələrinin və istifadəçi qurumların əməliyyat tələblərinə mühüm dəstək verir.
