Türkiyə Prezidentinin “TEKNOFEST Azərbaycan” festivalında iştirakı gözlənilir
Azərbaycanın paytaxtı Bakı şəhərində 26-29 may tarixlərində keçiriləcək “TEKNOFEST Azərbaycan – 2022” Aviasiya, Kosmos və Texnologiya Festivalına hazırlıqlar davam edir.
“Poliqon”un məlumatına görə, “TEKNOFEST Azərbaycan” festivalında Azərbaycan Prezident İlham Əliyev ilə Türkiyə Prezidenti Rəcəb Tayyib Ərdoğanın iştirakı gözlənilir.
Türkiyədən kənarda ilk dəfə Azərbaycanda keçiriləcək TEKNOFEST festivalının təşkilatçıları “Türkiyə Texnologiya Komandası” – T3 Fondu, Azərbaycanın Rəqəmsal İnkişaf və Nəqliyyat Nazirliyi və Türkiyənin Sənaye və Texnologiya Nazirliyidir.
“TEKNOFEST Azərbaycan” çərçivəsində 8 kateqoriya üzrə texnologiya müsabiqələri, “Smart Qarabağ” Hakatonu, “Take Off” Azərbaycan Startap Sammiti və “Rocket League” video oyunu üzrə Avropa Kiber İdman Kuboku təşkil olunacaq.
Tədbirin sərgi hissəsində tərəfdaş qurumların məhsul və həllərinin, eləcə də gənclərin hazırladıqları prototiplərin və STEM layihələrin nümayiş olunması, açıq səma altındakı statik ərazidə isə pilotsuz uçuş aparatları və helikoterlərin sərgilənməsi nəzərdə tutulur.
Festivalın əyləncə proqramına Azərbaycan Hərbi Hava Qüvvələrinin, eləcə də Türkiyənin “Türk Ulduzları” və “Solo Türk” aerobatika komandalarının nümunəvi pilotaj uçuşları, böyük səhnədə incəsənət xadimlərinin çıxışları, şaquli külək tuneli, su attraksionları, uçuş simulyatorları, robotlar və s. daxildir.
Qeyd edək ki, TEKNOFEST Türkiyənin ən böyük aviasiya, kosmos və texnologiya festivalıdır. Tədbir “Türkiyə Texnologiya Komandası” – T3 Fondu və Türkiyə Respublikasının Sənaye və Texnologiya Nazirliyi tərəfindən 2018-ci ildən etibarən hər il təşkil olunur.
Azərbaycan ilk dəfə 2021-ci ildə TEKNOFEST Aviasiya, Kosmos və Texnologiya Festivalında iştirak edib. Festivalın sərgi hissəsində Rəqəmsal İnkişaf və Nəqliyyat Nazirliyi tərəfindən qurulmuş Azərbaycan Milli Pavilyonunda 11 yerli şirkət və startapın məhsul və həlləri nümayiş olunub, həmçinin ölkəmizin yerli istehsalı olan pilotsuz uçuş aparatları sərgilənib. Tədbir çərçivəsində təşkil olunan hava şoularında Azərbaycan Hərbi Hava Qüvvələrinin pilotları MiQ-29 döyüş təyyarələri ilə solo pilotaj uçuşları həyata keçiriblər.
“TEKNOFEST Azərbaycan” festivalında ziyarətçi kimi iştirak üçün qeydiyyat artıq başlayıb. Qeydiyyatdan keçən şəxslər festivala ödənişsiz giriş edəcəklər.
Qeyd edək ki, “Poliqon” jurnalı “TEKNOFEST Azərbaycan” festivalının media tərəfdaşı qismində çıxış edir.
Rizvan Fikrətoğlu