Türkiyənin SDT şirkəti ilə Pakistan HHQ arasında müqavilə imzalanıb

Türkiyənin SDT şirkəti Pakistanın Hərbi Hava Qüvvələrinə (HHQ) simulyasiya sistemləri tədarük edəcək.

“Poliqon” xəbər verir ki, bununla bağlı tərəflər arasında IDEAS-2022 sərgisi zamanı müqavilə imzalanıb.

Müqaviləyə əsasən SDT şirkəti Pakistan HHQ-ni SDT ACMI podları və Yer Stansiyaları ilə təmin edəcək.

Pakistan HHQ tərəfindən təhvil alınacaq SDT ACMI podları JF-17 qırıcılarına quraşdırılacaq və pilotların döyüş hazırlığının artırılması üçün istifadə olunacaq.

Döyüş təyyarələrinin qanadının altındakı xarici asqılara taxılan SDT ACMI podları təlim vaxtı pilotların həm “hava-hava”, həm də “hava-yer” tipli əməliyyat ssenarilərini yetirməsinə imkan verir. Bu pod sistemi yüksək sürətli və mənzilli RF məlumat bağlantısı, inteqrasiya edilmiş prosessorları sayəsində istifadçini real vaxt rejimində avtonom mövqe yaratma bacarığı, silah simulyasiyası və hədəfin vurulması/vurulmaması ilə bağlı bildiriş göndərmək qabiliyyəti ilə təmin edir.

Qeyd edək ki, Türkiyə Hərbi Hava Qüvvələri də pilotların hazırlanması və döyüş bacarıqlarının yüksəldilməsi üçün SDT ACMI podlarından yararlanır. Həmin podlar Türkiyə HHQ-nin F-16 qırıcılarına inteqrasiya edilərək istifadə olunur.

Poliqon.az