AK-15 avtomatının yeni variantları ilk dəfə Əbu-Dabidə təqdim olunacaq
Rusiyanın “Kalaşnikov” konserni AK-15 avtomatının yeni variantlarını ilk dəfə IDEX-2025 sərgisində təqdim edəcək.
“Poliqon” “Kalaşnikov”a istinadən xəbər verir ki, sərgidə yeni AK-15 qısaldılmış (AK-15K) və AK-12 kompakt (AK-15SK) avtomatları təqdim olunacaq.
Qeyd edilib ki, 7.62×39 mm-lik patronlardan istifadə edən AK-15K və AK-15SK avtomatları düşmən canlı qüvvəsini məhv etmək üçün təyin olunub. Avtomatlar müasir döyüş tələblərinə cavab verən təkmilləşdirilmiş texniki, erqonomik və əməliyyat xüsusiyyətlərinə malikdirlər.
Maqazin tutumu 30 patron olan hər iki avtomat kütləsi 0.8 kiloqramdan çox olmayan aşağı səs-küylü atəş cihazı (səsboğucu) ilə təchiz edilib.
Boş kütləsi 3.4 kq və lüləsinin uzunluğu 290±20 mm olan qısaldılmış AK-15K avtomatının səsboğucu olmadan uzunluğu döyüş vəziyyətində 810 mm, yığılmış vəziyyətdə isə 570 mm-dir.
AK-15SK kompakt avtomatı AK-15K ilə müqayisədə daha yüngül çəkiyə və qısa lüləyə malikdir. Onun boş kütləsi 3.2 kq, lüləsinin uzunluğu isə 228±20 mm təşkil edir. Eyni zamanda, səsboğucu olmadan avtomatın uzunluğu döyüş vəziyyətində 750 mm və yığılmış vəziyyətdə 500 mm-dir.
Xatırladaq ki, “Kalaşnikov” konserni IDEX-2025 sərgisində AK-12 avtomatının da yeni variantlarını (AK-12K və AK-12SK) ilk dəfə təqdim edəcək.
