Belarus “Polonez” uzaq mənzilli reaktiv yaylım atəş sisteminin daha güclü raketlərlə təchiz olunmuş “Polonez B-300” versiyasını hazırlayıb.
Bu barədə “AzerDefence” Belarus mətbuatına istinadən məlumat verib.
Belarus Dövlət Hərbi Sənaye Komitəsinin sədri general-leytenant Sergey Qurulyev bildirib ki, Belarus Silahlı Qüvvələrinin raket-artilleriya qoşunlarının silahlanması üçün nəzərdə tutulan B-300 modifikasiyasının atış məsafəsi 300 km təşkil edir.
Qeyd edək ki, hazırda Belarus Ordusunun silahlanmasında olan “Polonez” raket kompleksinin atış uzaqlığı 200 km-dir.
“Polonez” sisteminin bir maşını raketlərlə eyni zamanda səkkiz hədəfə dəqiq zərbə endirməyə imkan verir. Maksimal məsafədə koordinatdan sapma 30 metrdən çox deyil.
Sergey Qurulyev bildirib ki, bu il B-300 modifikasiyasının qoşun sınağı keçirildikdən sonra, ordunun silahlanmasına daxil ediləcək.
